Ka Jaiñtia Students’ Movement (JSM) Eastern Region ha ryngkat ka JSM Wapung Unit hadein ba la ïoh jingtip ba la jah ka longkmie ka (L) Lita Ryngkhlem na ka Shnong Wapung Shnong naduh ka 25 tarik bnai Nohprah, 2023 bad la lap ïa ka metïap jong ka ha ka tarik 31 tarik Nohprah ha ka jaka ba hap ha Shnong Mookhep, East Jaiñtia Hills District.
Kane ka la pyndap ïa ka Seng da ka jingbitar haduh katta katta ba na kawei ka por sha kawei pat ïa ka jingjia ba khah khah kum kine ki jingjia hapoh ka thaiñ ba ki kynthei ki khynnah ki shah ïuhroit ïa ka hok long briew man briew ha ki riew thrangsnam ki ba pynïap dusmon ïa ka mynsiem briew khlem da don shuh ka mynsiem ïa tip lem para briew.
Kumta halor kane ka shah pynïap dusmon kane ka longkmie na ka liang ka Seng JSM lyngba ki Nongïalam jong ka ki la trei borbah ban thwet bad wad ki lad ki lynti ban buddien ïa kane ka jingjia tad haduh ban da lap trai ïa ka jingdonkti jong u wei u briew uba kyrteng Monkiru Chyrmang ba ju khot sin kum u Swet, 29 snem ka rta.
Ka Seng ha kane ka jingïaidlynti ban thwet ïa ki ba donkti ban pynïap ïa kane ka Longkmie ryngkat ha ka jingïatreilang bad ka VDP Mookhep bad ka bor Shnong haduh ban da ïoh ban bat ne kem ïa u tei u briew uba donkti ha ka janmiet jong ka 1 tarik January 2024 ha Mookhep bad la aiti ïa u sha ki Pulit jong ka Ladrymbai Police Outpost ban leh ïa kaba don kam katkum ka kyndon aiñ.
La ong ba kum kine ki jingjia ka buh jingma ïa ki kynthei khynnah ha kaba kim ïoh shuh ban imsuk imsaiñ ha ka imlang sahlang, Halor kane ka jingkem ïa utei u ba donkti ka Seng kala kyntu bad ban jur ïa ka bor jong ka aiñ ban pynshitom da kaba tyngeh ïa kum kine ki riew bymman da ka ba sdien phasi shisiendon khnang ban ym nang jia shuh ha ki sngi ki ban dang wan. La pynkut ka kyrwoh na u President JSM Eastern Region samla Wellson RD Siangshai bad u Kerbhame Dkhar, President JSM Wapung Unit.