Mynta ka sngi u MP ka Lok Sabha u ma Vincent. H. Pala ryngkat ka jingdonlang u Dr W.R Kharlukhi uba long u MP jong ka Rajya Sabha, ki la ioh ban plie paidbah ia ki tiar kiba iadei bad ka jingsumar ia ki nongpang ha Dr. Norman Tunnel KJP Hospital, Jowai, kiba kane ka jaka ai jingsumar ka la ioh na ka karkhana pynmih dewbilat ka Star Cement kaba ka la ai ia kane ka Hospital da ka kor Ultrasound Machine bad ka CSR Anesthesia Workstation kaba kane ka Hospital ka la ioh lyngba Chief Minister Special Development Fund.
Ia ka jingialang la pyniaid da u Rev. N.S Phawa uba long u Chairman ka Managing Committee. La ioh ia ka jingbatai lyngkot jong kane ka jaka ai jingsumar na ka Dr. D. Nongpluh kaba dei ka Medical Superintendent ka Hospital.
Ha kane ka sngi la don lang u Tejbir Singh uba long u Administrator ka Star Cement, uba la iathuh ia ka jingiaid lynti jong kane ka karkhna kaba khampher na kiwei pat ki para karkhana pynmih dewbilat kiba don ha kane ka jylla, ha kaba kane ka karkhana ka ioh ban leh shi bun ki kam jingiarap naduh ba kala sdang ban wan treikam hapoh kane ka jylla.
U ma Vincent Pala haba ai jingkren, u la ai ka jingiaroh ia ka Star Cement kaba dei kawei na ki karkhana kaba la ioh shibun ka nam na ka jinglehbha jong ha ki kam ki bapher bapher kiba iadei bad ka kam pynmih ia ki mar jong ka bad ka jingai jingiarap ia ki trai ri trai muluk, namar kumba long mynta kane ka karkhana ka don ha ki kyrdan ba halor ha ka jingbha jong ki mar kiba ka la pynmih. Na ka liang u ma Pala u la kyntu ruh ia ki heh kane ka karkhana ba kan nangiaibteng ban ai ki jingiarap sha kane ka jaka ai jingsumar kaba dei kawei na ki Hospital kiba la rim bha kaba don ha nongbah Jowai bad kaba ai ruh ka jingshakri ia ki paidbah jong baroh kawei ka ri lum Jaintia.
Kiwei de kiba ai jingkren ki kynthup ia u Deputy Commissioner ka West Jaiñtia Hills, ma Garod LSN Dyes, u Kingshok Kamal Borah, Manager CSR, Star Cement jingduwai bad Pule Bible na u H.C.T Sumer Executive Secretary KJP Synod Mihngi, ha ka jingiadonlang ki Doctor ki Nurses bad ki nongtrei ka Hospital.
