[U (L) Sylvanus Dhar (Chiang)]
Ka Seng Kur Dhar, Narpuh Unit kala pynpaw ka jingsngewsih halor ka jingjia shah pyniap dusmon jong u wei na ki dkhot jong ka Kur uba kyrteng u Sylvanus Dhar, 48 snem ei ei bad ia uba la ju khot ieit u ruh kum u Chiang Dhar, uba na ka shnong Umkiang kaba la jia hynnin ka sngi, 6 tarik mynta u bnai.
Na ka liang ka Kur ka phah ia ka khubor sngewlem sha kiba ha ïing ha sem bad ki khun ki kti jong une u samla rangbah jong ka kur uba la duh ei ia ka jingim ha ka kti ki suba ‘Khar Bangladesh kiba dei ki nongtuh nonglute ia ki bri kwai bri tympew jong ki Khasi Pnar bad kiwei de ki kam be-aiñ jong ki. Ka Kur Dhar ka buh ka jingduwai ha khmat u Blei Trai Kynrad ban ai ka jingpyntngen bad jingkyrshan bor ia baroh kiba haïing ha sem bad kiba don jingiadei baroh bad u Chiang Dhar. Ka buh ruh ka jingduwai ba ka Mynsiem ba kordor jong u Chiang Dhar kan ioh ban shongsuk ha dwar U BLei.
Ha kajuh ka por ka Kur Dhar ka buh ka jingkyntu kaba jur ia ki bor jong ka aiñ naduh ki bor Pulit haduh ki bor Sorkar Jylla ba kin shim khia halor kane ka jingjia da kaba kin kem shisyndon ia kiba donkti ban pyniap dusmon ia u ne u khun jong ka Kur Dhar bad ban pynshitom ia ki katkum ki kyndon jong ka aiñ.
Ka Kur Dhar Narpuh ka ai khublei kyrpang ruh ia ki bor shnong Umkiang bad ki Pulit Umkiang kiba la shim khiah ban leit shimti ia ka met jong u Chiang Dhar na ka jaka ba jia kane ka jingshah pyniap. Ha kaba la pynkit ruh ia ka met jong u sha Khliehriat Civil Hospital ban pyndep katkum ki kyndon jong ka aiñ.
La pyntip ruh ba ia ka met ba dangsah jong u Chiang Dhar yn sa tep donburom lashai ka sngi ha u Lum jingtep ka Balang Katholic Umkiang, ha ka por 11:30 AM.
Kane ka long katkum ka jingpyllait khubor lyngba u President u ma G. Dhar bad Secretary ma J. Dhar.