U Myntri jong ka Sports and Youth Affairs ka sorkar Jylla u bah Shakliar Warjri mynta ka sngi ula kaweh lama ia ka Torch Relay jong ka 5th Meghalaya Games kaba la sdang na Shillong SSA Stadium ka ban iaid shaduh Tura, West Garo Hills ha kaba kane ka Game kan sdang naduh ka 15 haduh ka 20 tarik mynta u bnai.
U bah Shakliar haba ai jingkren ha kane ka prokram u la pynpaw ka jingsngewkmen ban ioh sdang ia kane ka Meghalaya Game da kaba thang ia ka Toch bad ati sha ki nongpyniaid. U ong ba ka Meghalaya Game ka dei kawei na ki jingialehkai sport kaba heh duh hapoh ka Jylla, ula kitbok ruh ia baroh ki nongiashim bynta ki ban ia shimbynta ha kane ka jingialehkai sport.
U la ong ruh ba na ka liang ka sorkar jylla kala pynthikna ba kane ka sport kan long ka wei na ki jingialehkai ba biang eh hapoh ka jylla. Ka sorkar ka kyrmen ba lyngba kane jingialehkai ha ki liang bapher bapher ki samla nongiashim bynta kin sa lah ba pyni ia la ki jong ki sap ki phong ba ki don, bad la khmih lynti ba kin sa lah ban mihkhmat shaduh ka National Lever bad International Lever kum ha ka Olympic bad kiwei de.
Shuh shuh ka sorkar ka buh ia ka thong ba ki samla ka jylla kin ioh ban shim ia kane ka lad ka lynti bad ai mynsiem ia ki ban jied ia ka kam ialehkai sport kum ka lawei ym tang ka jingsngewtynnad. U la ong ruh ba ka jingpynmlien ha ki kam sport kan iarap shibun ia ki khun samla ba kin lah ban kiar na ki jingmlien ba sniew kum ka jingngop ha ki jingdih drok bad kiwei de ki jingdih ba sniew.
