U Myntri jong ka sorkar pdeng uba dei peit ia ka Health & Family Welfare u Dr. Mansukh Mandaviya mynta ka sngi u la pynbna lyngba ka video ban tei ia ka campus ba thymmai jong ka NIPER Guwahati bad ha kajuh ka por u la buh mawnongrim ia ka NIPER Hyderabad bad ka NIPER Raebareli. Ula plie bad buh mawnongrim ruh lyngba ka video conference ia kiwei de ki jingtei jong ka tnad ka koit ka khiah ba kyntup ia ki projek ba don ha Arunachal Pradesh, Assam, Manipur, Meghalaya, Mizoram, Nagaland bad Tripura.
Ha nongbah Shillon ka Myntri jong ka koit ka khiah ka sorkar jylla ka Dr. Mazel Ampareen Lyngdoh ruh kala plie pyrda ia ka Integrated Public Health Laboratory (IPHL) hapoh ka PM-ABHIM ha Pasteur Institute, Shillong. Hapoh jong ka skhim PM-ABHIM (FY 2021-2026) ka Myntri kala pynbna ba yn sa tei ia kiwei de ki Critical Care Block (CCB) bad ki Integrated Public Health Laboratory (IPHL) ha ki 7 tylli ki District hapoh ka jylla.
U Myntri Rangbah ka jylla Assam u Dr. Himanta Biswa Sarma, Myntri Rangbah ka Tripura, Manik Saha bad u Union Minister of State for Chemicals & Fertilizers and New & Renewable Energy, u Bhagwanth Khuba ruh kila ai jingkren ha kane ka jingialang.
