Ka President jong ka ri India ka Droupadi Murmu kan wan jngoh ia ki ar tylli ki jylla jong ka thaiñ shatei lammihngih ka ri kata ia ka jylla Meghalaya bad Assam naduh ka 15 haduh 17 tarik u Kyllalyngkot, 2024.
Ha ka 15 tarik u Kyllalyngkot ka President kan plie pyrda ia ka lympung ialehkai 5th Meghalaya Games, ha PA Sangma Stadium, Tura.
Ha ka 16 tarik, ka President kan ai jingkren sha ki dkhot jong ki Self Help Group ha ka kad liengsuin Baljek, Tura bad kan buh maw nongrim lyngba ka video conference ia ka Integrated Administration Complex ba thymmai ha Tura.
Ha kajuh ka sngi, kan ai jingkren lyngba ka video conference ha ka jingialang ka ban long ha Mawphlang bad ka pynheh ia ka surok Rongjeng-Mangsang-Adokgre Road bad ka surok Mairang-Ranigodown-Azra Road, kumjuh ka jingbuh maw nongrim ia ka Shillong Peak Ropeway bad ki jaka sah ki nongjngoh kai pyrthei ha ka shnong Kongthong, Mawlyngot bad Kudengrim.
Ha ka por janmiet pat ka President kan iashim bynta ha ka prokram pdiang burom ia ka, ka ban sa pynlong da ka Sorkar Meghalaya ha Raj Bhavan, Shillong.
Ha ka 17 tarik u Kyllalyngkot pat ka President kan iashim bynta ha ka jingrakhe Golden Jubilee jong ka Karbi Youth Festival ha Taralangso, Diphu jong ka jylla Assam.