Mynta ka sngi ki nongialam Ka Synjuk Ki Waheh Chnong (KSKWC) Jowai hadien ba la wai ka jingialang pynsngewthuh paidbah halor ka ‘Awareness Programme on Waste Segregation’ na ka bynta ban sam ia ki Household Blue Bins bad Green Bins ba la pynlong da ka ophis ka Jowai Municipal Board ha Ladthadlaboh Jowai, kila ioh lad ban ia kynduh ia u Deputy Commissioner ka District u ma Garod LSN Dykes IAS ban pynsngew ha u ia ki jingeh kiba ki nongshong shnong ka shnong Jowai ki iakynduh.
Ha ka jingiakynduh ka Synjuk kala ioh ban pyntip ha khmat u DC ia ka jingeh ha kaba iadei bad ka Wah Myntdu. Ka Synjuk kala pynkynmaw ia u bah Garod ba ka hukum jong ka kyndon 144 CrPC kam shym la treikam satia wat hadien bala dep pynmih ia ka kum ka lad ban iada ia ka wah Myntdu. Ki nongialam jong ka seng ki pynpaw ba ka jingkhar shyiap, ka jingtih maw bad ka jingpyntuid pathar ia ka khyndew sha ki bynta jong ka Wah Myntdu ka dang iai bteng hi haduh kine ki sngi.
Ki nongialam kiba kynthup ia u President ka Seng u ma Alan Niangtia, u General Secretary ma Riquoma Rq. Laloo bad u Tresurer ma D.H. Pde kila pynpaw ba lada ki briew kiba don bynta ha kane ka kam kin ioh lad ban bteng ia kane ka kam, kan sa ktah jur ia ka jinglong jingman jong ka Wah Myntdu khamtam ha kine ki por ba la poi ka aiom Tlang ha kaba ka um kala stang.
Kumta ka Synjuk ka kyntu jur ia u Deputy Commissioner ba un shim khia kloi katba lah ha kaba iadei bad ka jingiada ia ka Wah Myntdu.
Na ka liang jong u DC ruh ula kloi ban shim khia ia kane ka kam bad ula ong ban teh lakam ia kane kino kino kiba lap ba don ki riew shim kabu kiba leh ia kine ki kam, dei ban shon da ki dur bad leit ujor mar mar sha ka ophis jong u khnang ba ioh leh ia kaba donkam katkum ka aiñ.