Ka All Jaintia Environmental & Social Welfare Society (AJE&SWS) ka pynpaw ka jingsngew budnud haduh katta katta halor ka jingshah pynkynriah kam noh jong u bah E. Kharmalki uba ju bat kum u Deputy Commissioner ka East Jaintia Hills District.
Mynta ka sngi ka Seng kala ioh lad ban leit ia kynduh markhmat ia u bah Kharmalki ha ophis treikam jong u ha Khliehriat na ka bynta ban ai khublei ia u bad pynpaw ka jingsngewsih halor ka jingleh hak dak jong ka sorkar ban pynkynriah kam ia u wat la ka samoi treikam jong u kum u DC hapoh katei ka District kam pat dap pura.
Na ka liang ka Seng ka pynpaw ka jingbynniaw ia kane ka jingshah pynkynriah kam utei u ophisar, da kaba pynpaw ba dang don shibun ki kam pynroi kiba u dang don ban pyndep hapoh katei ka District. Kumta ka seng ka kyntu ia ka sorkar ba ka dei ban wat shwa ia ka jingshisha ha shwa ba kan pynkynriah kam ia u, namar kum ka District East Jaintia Hills ka dang donkam haduh katta katta ia u bah Kharmalki pynkut ka khubor na ki nongialam ka AJE&SWS.
