Ki saw tylli ki kynhun ba kynthup ïa ka Dorbar Shnong Saipung, ka Village Defence Party (VDP) Saipung Village, ka Biate Youth Association, Saipung Branch bad ka All Biate Student Association, Saipung Unit kila buh da ka jingujor ejahar pyrshah ïa u Rollinson Dkhar uba na ka shnong Jalaphet halor ki kam pynkulmar bad shoh briew bad maham siat briew jong u.
Katkum ka ejahar kaba la ai ha u Officer In Charge ka Saipung Police Station, Saipung, East Jaiñtia Hills ha kane ka 19 tarik mynta u bnai la ïathuh ba ki bor pyniaid shnong ryngkat ki VDP bad kiwei pat ki kynhun kila ioh ia ka jingujor ha ka 17 tarik na ki riew paidbah jong ka shnong Saipung kiba la shah shoh ban pynmynsaw ha ka kynhun jong ki riew runar hapoh ka jingialam jong u tei u Rollinson Dkhar.
Katkum katei ka jingiathuh jong kitei ki riewpaidbah ba ha ka 17.01.2024 ha ka por 4:30 PM u tei u Rollinson Dkhar ryngkat ka kynhun jong u kila rung shapoh ka shnong Saipung da ki 5 tylli ki kali bad kila sdang ban thaw jingkulmar hapoh shnong pohthaw.
Ha katei ka jingjia kila shoh pynmynsaw ia u wei na ki nongshong shnong uba la tip kyrteng kum u Priceless Darnei bad ïa u la hap ban pynkit noh da kiba ha ïing sha Saipung PHC ban ïoh jingsumar. Katei ka kynhun kala leit rung jubor ruh ha ka ïing sah jong u Lalramzoma Nampui, kila rung shaduh ki kamra thiah bad kila pynjot ïa ki mobile phone.
La ïathuh ruh ba u Rollinson Dkhar ula sei da ka Pistol bad maham siat ïa u Priceless Darnei. Na ka liang jong u Rollinson ula buh por ba hapoh 5 sngi u Lalramzoma, u Priceless, u Moia Ngirsim bad u Ruaiia Darnei ki dei ban siew pisa ïa u haduh T.15 lak tyngka bad lada kim pyndep ïa kane un sa wan ban siat ïap ïa ki.
Ha kane ka juh ka sngi u Rollinson bad ka kynhun jong u kila rung jubor sa ha ka ïing u Ruaiia Darnei bad shoh pynmynsaw ïa ka lok jong u ka Neii Darnei kaba la 50 snem ka rta bad ar ngut ki khun shynrang jong u, u Dikoma Darnei (16) bad u Tanthara Darnei (14) ha kaba ki para marjan kila hap ban leit pynkit ïa ki sha Saipung PHC ban ïoh jingsumar. Katba u Ruaiia Darnei pat ula lait na kane ka jingmynsaw namar ba um shym la don ha ïing ha kata ka por.
Kumta na ka liang jong kine ki saw kynhun kila buh ka jingkyntu kaba jur bha ïa ki Pulit jong ka Saipung PS ba kin shimkhia ïa kane ka jingjia khnang ba kan long ka jingïada ïa kitei ki saw ngut ki nongshong shnong kiba la shah maham ha u Rollinson bad kumjuh ruh ban pynïoh ïa ka jingshongsuk shongshngaiñ hapoh ka shnong ka thaw.