U Myntri Rangbah jong ka sorkar jylla u Conrad K. Sangma mynta ka sngi 23 tarik u Kyllalyngkot ula wan ban plie pyrda ïa ka ‘Wahiajer Multi Sports Complex’ ha West Jaiñtia Hills District lyngba ka jingïarap pisa na ka State Plan Scheme & Sports Authority of India’s Khelo India Infrastructure Scheme.
Ïa kane ka ‘Wahïajer Multi Sports Complex’ la wan ban bun mawnongrim da u myntri rangbah jong ka sorkar jylla u Conrad K. Sangma ha ka 29 tarik u Kyllalyngkot 2021 ha ka jinglut ban tei ïa ka kaba la kot sha ka Rs. 24,97,11,000/- tyngka.
Mynta ka sngi la wan ban ïadonlang da ki ar ngut ki Symbud Myntri Rangbah kata u bah Prestone Tynsong bad u ma Sniawbhalang Dhar MLA ka thaiñ, nalor u myntri ka kam ïalehkai Sports bah Shakliar Warjri, u Dr. D. Vijay Kumar, IAS Commissioner & Secretary Sports & Youth Affairs, ka Dr. Ampareen Lyngdoh, u ma Wailadmiki Shylla MLA, ka Santa Mary Shylla MLA, ki MDC nalor ki hajar ngut ki paidbah kiba la wan sakhi ïa kane ka sngi.
U myntri rangbah haba kren kum u kongsan ula pynpaw ka jingsngewnguh da kaba ong kine baroh ki dei lyngba ki jingkhykhu jong u Blei, haka juh ka por ula ai ka jingïaroh kyrpang ïa u MLA ka Thaiñ u ma Sniangbhalang Dhar uba la trei shitom met bad mynsiem ban pynïaid shaid shaid ïa kane ka project kaba hap hapoh ka District bad ha ka jylla hi baroh kawei.
Ula ong kane jaka ïalehkai kan ïarap shibun eh ïa ki samla ba kin ïoh lad ban pynpaw pyrthei ïa ka sap ka phong ïalehkai na ka bynta ka lawei jong ki bad kan long shisha ka jingkyrkhu kaba khraw na ka bynta ki samla ïalehkai jong ka Ri-lum Jaiñtia.
Shuh shuh ula pynsngew ha kine ki san snem lyngba kane ka sorkar ba mynta kala ïaleh ban pynkiew bha ïa ka kam ïalehkai Sports hapoh ka jylla lada ïa nujor bad ki 40 tylli ki snem ba la dep, ula pynsngew wat ïa ki jaka sumar kum ki PHC, CHC la pynkiew kyrdan ïa ki nalor ka jingtei bad kumjuh ïa ki skul, ki College bapher bapher kiba la kiew ar shah ha kine ki san snem bala dep.
U la pynsngew na ka liang ka sorkar kan pynlong ïa ka jingpynkup burom ïa ki rangïalehkai jong ka jylla kiba la jop ha kane ka Meghlaya Games 2024 kaba dang shu dep bad ïa kane ka jingleh burom yn pynlong ha nongbah Shillong.
U Conrad K. Sangma ula ong ym tang ha ka kam ïalehkai Sports ka sorkar ka ïaleh ban pynkiew ïa ka lad pule puthi ha ki subject bapher bapaher la ha ka Science ne Mathematics, nalor ki kam seng kam seng jam bad kiwei de kiba lah ban wanrah ha kine ki sngi ban wan.
Ha ka jingkren u Myntri Rangbah ula pynsngew ba ki don ïa ka thong ban pynlong ïa ka phutbol Tournament na baroh ki 60 tylli ki Constituency hapoh ka jylla, ha kaba ki Constituency jong ki MLA ki lah ban ïashim bynta ha kane ka Tournament.
