Ha ryngkat bad ka ri India baroh kawei, mynta ka sngi 26/01/2024 ka Jylla Meghalaya ruh kala rakhe ia ka lyngkhuh snem ba 75 jong ka Republic Day. Ia kane ka jingrakhe la pynlong ha ki District Head Quarter bad ki Sub-Division bapher bapher hapoh ka Jylla Meghalaya.
Ha nongbah Shillong la pynlong ia ka jingrakhe ha Polo Ground ha kaba u Lat ka Jylla u Phagu Chauhan ula pynher ia ka lama lai rong ka ri India bad shim ia ka salute jong ki kynhun ba ialeh ia ka march-past kiba kynthup ia ki shipai BSF, CRPF, District Executive Force, East Khasi Hills District, Sikkim Police, 1st MLP Bn, NCC Boys, NCC Girls, Meghalaya Bharat Scouts and Guides, Sacred Heart Girl’s Hr. Sc. School, Brass Band Border Wing Home Guards and Pipe Band Assam Regiment Centre.
Ha kane ka prokram u Lat ula sam ruh ia ki khusnam U Tirot Sing Award 2024 na ka bynta ka Arts and Culture sha u bah Risingbor Kurkalang, ka Pa Togan N Sangma Award 2024 na ka bynta ka Social Service sha u Dr. Delphine Gare Momin bad ia ka khusnam U Kiang Nangbah Award 2024 kaba iadei bad ki kam sport sha u Phrangki Buam.
La sam ruh ia ka Megha Health Insurance Scheme (MHIS) & Pradhan Mantri Jan Yojana (PMJAY) awards na ka bynta ki Hospital. Ka PHC kaba lah duh hapoh East Khasi Hills la ioh da ka Pomlum PHC, Ka CHC hapoh ka Jylla kaba long ka lahduh ka dei ka Mawphlang CHC , East Khasi Hills. Ki Hospital bad jaka sumar jong ki riew shimet la ioh rah da ka Bethany Hospital, Shillong bad ka Bansara Eye Care Centre, East Khasi Hills, ka Chest Hospital la ioh rah da ka Reid Provincial Chest Hospital, East Khasi Hills District bad ka Maternal and Child Hospital la ioh da ka Ganesh Das Government Maternal & Child Hospital, East Khasi Hills District. Ha ka juh ka por ka Reid Provincial Chest Hospital, East Khasi Hills District kala ioh ia ka khusnam Ayushman Bharat Pradhan Mantri Jan Arogya Yojana Quality Certification Hospital.
Ka la don ruh ka jingsam khusnam Police Medal for Meritorious Service (MSM) kaba la ai sha u bah Vivek Syiem, Superintendent of Police (City), Shri John M Sangma, AB-Inspector bad Shri Teibor Sumer, Havildar bad ka Home Guards & Civil Defence Medal for Meritorious Service ba la ai sha i Smti Aniosca Basaiawmoit, Inspector kum Senior Instructor ha Central Training Institute of Civil Defence and Home Guards, Mawdiangdiang.
Ha nongbah madan Polo la iohi ruh ia ki Tableau kiba la wanrah da ki tnat treikam bapher bapher jong ki ophis sorkar. Ka Tableau kaba la ioh nyngkong ka dei ka DCIC-East Khasi Hills, kaba wan ba-ar ka Meghalaya State Skills Development Society bad kaba wan ba-lai ka dei ka District Animal Husbandry and Veterinary.
Ha ka March Past ka NCC Girls kala ioh ia ka nam ba nyngkong, ka ba wan ba-ar pat ka dei ka NCC Boys bad kaba wan ba-lai ka dei ka Sacred Heart Girl’s Hr. SS.
Kila don ruh kiwei pat ki jingpynbyrngia ha kane ka sngi kiba kynthup ia ki prokram tynrai ba la pyni da ka Seng Khasi HSS, ka Mawngap District Christian Multi-Purpose Higher Secondary School, ka Sanmer Higher Secondary School, Upper Shillong bad ka Mission UP SSA School, Mawryngkneng.
