(By M.M. Thaiang)
Naduh ba ioh ia ka Jowai Diocese ha ka snem 2006, ki bor pyniaid Diocese man ka snem ki buh ia kane ka jingiasengbah jong ka Diocese na kawei ka Parish sha kawei ka parish bad mynta ka snem 2024, la pynlong ia kane ka jingiasengbah ka Diocese ha St. EUGENE PARISH CHURCH LAD-LAKADONG, kaba dei ruh ka sngi lyngkhuh snem kaba 18 snem jong ka Jowai Diocese.
Ha kine ki 18 snem kiba la leitnoh ha man la ka 28 tarik u Kyllalyngkot, ki paidriewngeit jong ka Balang Katholik ki rakhe bad kynmaw burom ia kane ka sngi bad kane ka jingiasengbah jong ka Diocese ka hap ha kane ka sngi, da ki hajar ngut riewngeit na ki 18 tylli ki Parish ka Jowai Diocese ki la iatuid sha Ladlakadong ban pynkhraw ia kane ka sngi ha ka juh ka por ban pynkhraw ia ka Proseshon Iukharist kaba shisien shisnem jong ka Diocese.
Ha shwa ban sdang ia ka jingknia Mas Iukharist bakhuid la ioh ia ka ingkren pdiang sngewbha ia baroh ki nongwan jingiaseng da u Phadar Valant uba long ruh u Phadar Rangbah Parish Priest jong ka Parish Lad-lakadong bud sa ka jingpynher ia ka Lama bad ki Balun da ki 18 ngut ki Parish Priest jong ka Jowai Diocese ha ryngkat u Rt. Rev. Ferdinand Dkhar dd Bishop ka Jowai Diocese kum ka dak ka jingrakhe ia ka jingdap 18 snem jong ka Diocese.
Ia ka jingkñia Mas Iukharist bkhuid la lamkhmat da u Bishop Ferdinand ha ryngkat ka jingiakñialang da ki Phadar na ki 18 Parish jong ka Jowai Diocese.
Ha shwa ban sdang ia ka jingkñia Mas Iukharist, la ioh ruh ia ka History (Khanatang) lyngkot jong ka Diocese da u Phadar Martin Shylla. U Phadar Martin Shylla haba iathuh lyngkot ia ka History jong ka Diocese, u ong ha shwa ban ioh ia ka Jowai Diocese kaba pynkhlad na ka Archdiocese Shillong, ka Rilum Jaiñtia ka don tang shiphew tylli ki Parish bad ki paidriewngeit ki don tang kumba 65,095 ngut. Ha ka jingshimkhia jong u Archbishop Most Rev Hubert D’s Rossario Archbishop ka Jyla Niam bah Shillong (Shillong Archdiocese), u Kpa bakhuid Benedict XVI ha ka 28 tarik u Kyllalyngkot (January) 2006, u la kubur ban plie ia ka Jowai Diocese bad la thung (Elected) ia u Phadar Vincent Kympat, u Bishop uba nyngkong jong ka, ha kaba la pynkyntang Bishop ia u ha ka 2 tarik April 2006 ha Shillong da u Nuncio Most Rev Pedro Lopez Quintana. U Bishop Vincent Kympat u la shimti ia ka Shuki Bishop ka Jowai Diocese ha ka 3 tarik April 2006. U Bishop Vincent Kympat u long u Bishop uba nyngkong eh jong ka Jowai Diocese.
Shuh shuh u Phadar Martin Shylla u ong hadien ka jingkhlad noh u Bishop Vincent Kympat ha ka 30 tarik July 2011, tang hapoh 9 sngi, u Archbishop Dominic Jala u la phah ia u ka Phadar Hilarius Lamare kum u Diocesan Administrator ka Jowai Diocese katba ym pat wan shimti u Most Rev Thomas Memanparampil (Archbishop Emeritus) kum u Apostolic Administrator. Nangta ia ka shuki ba thylli jong ka Jowai Diocese la wan shimti ha ka 3 tarik February 2014 da u Most Rev, Victor Lyngdoh dd, u Bishop ba mynshwa jong ka Nongstoin kum u Bishop uba ar jong ka Jowai Diocese bad u neh kum u Bishop jong ka Jowai Diocese haduh ba la pynkiew kyrdan ia u ha ka 23 tarik December 2020 kum u Archbishop ka Archdiocese Shillong. Ban pyniaid ia ka Jowai Diocese lathung ia u Phadar Ferdinand Dkhar u Administrator bad la pynbna Bishop ia u (Bishop Elected) ha ka por 12 baje mynsngi ha Nongbah Rome bad 3.30 PM ha India ha ka 8 tarik July 2023. U Bishop Ferdinand Dkhar u long u Bishop uba lai jong ka Jowai Diocese. Nangta u Phadar Martin Shylla u pynkut ia ka History da kaba ong ba kat kum ka jingkheiñ jong ka snem 2022, ki Katholik ki don 1,21,978 na ka total popultion kaba 4,32,789 jong ka Rilum Jaiñtia.
Hadien ka jingkñia Mas Iukharist bakhuid la pynkut ia kane ka sngi burom kaba 18 snem jong ka Diocese da ka Proseshon Iukharist bad pynkut da ka jingkyrkhu da ka Sakrament bakhuid tam jong ka Duwan. Ha kane ka sngi la iawan shim bynta ruh da u ma Vincent H Pala, MP, Lok Sabha, ma Kyrmen Shylla, Myntri ka sorkar Jylla, ka kong Santa Mery Shylla, MLA bad kiwei de ki riewkhmat jong ka thaiñ kiba la shah khot sngewbha.
