-Pynpaw u Speaker ia ka jingdonakor bad donburom ki MLA ka Meghalaya hapoh ïingdorbar thawaiñ-
U Speaker jong ka ïing Dorbar thawaiñ ka jylla u Thomas A Sangma ha ka sngi Saitjaiñ (27.1.2024) ula leit ban iashim bynta ha ka sngi plie ia ka jingialang jong ka 84th All India Presiding Officers Conference (AIPOC) kaba la pynlong ha Maharashtra Legislative Assembly, Mumbai jong ka jylla Maharashtra.
Ia kane ka jingialang la wan ban plie da u Speaker jong ka Lok Sabha u Om Birla bad na ka liang jong u Prime Minister ka ri u Narendra Modi ruh ula ai jingkren lyngba ka video online.
Ha kane ka jingialang la iakren halor ki mat bapher bapher ba kynthup ia ka jingpynkhlaiñ iaka jingshaniah jong ki paidbah ha ka jingsynshar paidbah, ka jingnang ban long kiba don akor burom hapoh ka ïing dorbar bad kumno ban pynlong ia ka rukom pyniaid dorbar kaba don jingmut bad ba treikam.
Na ka liang jong u Thomas A Sangma ula ioh ban iashim bynta ha kawei na ki topic kaba ong ‘to strengthen people’s trust in democratic institutions – the need to maintain discipline and decorum in Parliament and the legislatures of States and UTs.’
U Sangma u la iathuh ruh ba jingshong dorbar hapoh ka Meghalaya Legislative Assembly barabor ka long kaba donburom bad donakor wat hapdeng katto katne ki khep ba ki don ki jingiatai nia kiba jur. U ong ba ki dkhot jong ka ïing dorbar ki shait burom ia ka ïing bad kam juh don kano kano ka jingiatur shongshit ne ka jingiarah placard ban pyni ia ka jingpyrshah, hynrei ka don tang ka jingmih shabar na ka ïing dorbar da ki katto katne ki dkhot haba ki pynpaw ia ka jingpyrshah jong ki.
U ong ruh ba kum ki shongknor dei ban don ia ka jinglong kaba lah ban pdiang ia ki nongialam la ka dei ia ki liang synshar ne ia kiba don ha ka liang pyrshah ruh khnang ba kan don ka jingiadei kaba jan na baroh arliang ki kynhun.
