Ka KSU Central Executive Council ha ka 27/1/2024 ka lah ioh ban pynskhem ia ki nongialam thymmai jong ka KSU Jowai Circle na ka bynta ka samoi treikam 2024-2027 kaba hap hapoh ka jingpeit jingkhmih jong ka KSU West Jaiñtia Hills District Unit.
Ha kane ka sngi bun ngut ki samla na ki dong bapher bapher jong ka Sor Jowai kiba la wan shakhmat da ka jingkitkhlieh ban ia bah lyngkor lem ia ka khia ka shon ka jaidbynriew lyngba ka Seng KSU.
La pynskhem ia kitei ki nongkitkam ba thymmai jong ka KSU Jowai Circle da u samla Pynshaiborlang Rani uba long u Information and Publicity Secretary ka KSU Central Executive Council, u samla Shiningstar Kharbihkhiew u Environment secretary ka KSU u Samla Nangshngaiñbha Lakiang Assistant General Secretary KSU Upper Shillong Circle bad ruh ki nongialam ka KSU WJHDU naduh u President u Samla Laitphar Syngkrem, u vice President u samla chanbor War u Samla Leningrad Tariang General Secretary bad ruh u samla Phrangki Papang uba dei u Finance Secretary.
Ha kane ka sngi lah ioh ka jingsneng jingkraw bad ka kitbok kit rwiang na u Samla Pynshai Rani ba kum ka seng ka ba don la ka Riti trei kam bad ka nongrim ba skhem kan iai long ka nongiada ka ban pynneh pynsah ia ka Snap Paka ka jaitbynriew la ka long ha kano kano ka Bynta.
“Ngin iai long Shi Tylli Shi Para kam pher ngi wan na kano ka Thaiñ ne Hima ne na kano ka kur ne ka Jingngeit hynrei ngin iai long kawei ka jaitbynriew kaba Ia teh song mlon khnang ba kiwei pat ki heh paid ne ki nongshun kin ym lah ban jop ia ngi la ka long ha ka Thma Pyrkhat ne ka Thma Bor Met”.
Une u Nongialam u la pynkynmaw ruh ba Ka jingpharia ia ka Jaidbynriew da ki nongwei i kumba kam don jingkut shuh. Haka por u doh lieh mynshwa u la pharia lyngba ka jingsngew pher hima katba u doh iong mynta pat u la pharia iangi ha ka dur ka jingia sngewpher niam, sngew pher Thaiñ ha ki dur kiba bun rukom.
Kumta u la ong ba ngi dei ban da Husiar khnang ba kum kine ki buit poh ba rieh jong ki Dohiong ne jongno re jongno kim dei ban shah teh sha khum ha ka Saiñ Pyrkhat ka jong ki Dkhot ka KSU. Wat la bun ki kot kudi ba lah khleh nimja hynrei ngin pyntikna pat ba kam dei ban dkut ne khoi noh. “Ngin pyntikna ba u Latai jongngi un dang bun ksai bad u Nimja jongngi un dei u ba khor khnang ban lah ban mait lut ia ki Jingeh Jingwit baroh” la pynkut une u Samla Nongialam.
