Ka Hynñiewtrep Border Disputed Redressal Forum (HBDRF) mynta ka sngi 29 tarik u Kyllalyngkot lyngba u Chairman jong ka u Bah C. Sungoh bad ki dkhot jong ka Forum kila leit ai jingthoh sha u Deputy Commissioner jong ka West Jaiñtia Hills District halor kiba bun ki mat kiba ïadei bad ki jingeh jong ki pait nongshong shnong jong ka Labang Nangphyllut (Block-1)
Ha kane ka jingthoh ka Forum kala pynpaw ïaki jingeh jong ki Khasi Pnar kiba shong basah ha Block-1 baki shah pyndik haki Karbi. Ha kaba ki Karbi ki maham bad pyntieng pynsmiej ïaki Khasi Pnar ba kin ym pynpaw ïaka jingkwah jingthrang jong ki ban don sha Meghalaya haka jingthmu jong ka sorkar ban pynbeit ïa u pud u sam hapdeng ka jylla Assam bad Meghalaya.
Halor ka jingkhang pyrshah jong ki ban pynlong ïaki jingïalang paitbah khamtam haka jingïadei bad ka kam pynbeit pud. Ka jingkhang pyrshah ïaki Khasi Pnar ban kit ban leit die ïaki mar rep jong ki sha ki ïew kiba don sha Meghalaya bad haka jingïadei bad ka ïew thymmai ki Karbi haka shnong Myn-i ïa kaba kila pynlong sngi ïew haka juh ka sngi bad ka ïew Khanduli bad ba ki (Karbi) ki khang pyrshah ïaki Pnar na Block-1 ban kit ïa ki mar rep jong ki sha ïew Khanduli.
Ka Forum kala ai ruh ïaka rai kaba kala shim haka jingïalang kaba la long haka 14.10.2023 ha District Library Mynthong Jowai ha u DC West Jaiñtia uba long ruh u Member Secretary jong ka Regional Committee West Jaiñtia Hills District.
Ki rai ki long kine harum:
Ka jingpyrshah ïa ka Notification No.TAD/R/31/80/151 Dated 13.4.1951 ba pynmih daka Sorkar Assam kaba la pynhap jubor ïaka Elaka Labang Nangphyllut sha Karbi Anglong Assam. Ba ka Regional Committe bad ka sorkar ki dei ban rah ïaka Report haka Meghalaya Legislative Assembly ban ïoh ïakren ïatai hashwa baka sorkar bad u Chief Minister kin shim ïaka rai kaba khatduh.
Ka jingpyrshah ïaka jingbuh jong ka Regional Committee West Jaiñtia Hills District ïaka Psiar bad Khanduli Sector haka jingthmu jong ka jingïa pynbeit pud.
Ban ïeng ban dawa baka Elaka Labang Nangphyllut ne Block-1 ka dei beit ban wan sha Meghalaya bad ba lada ka Assam kam mynjur ban pynphai ïaka Block-1 sha Meghalaya te u Chief Minister um dei ban soi ïaka MoU ïa pynbeit pud.