Pynsngew ka JNC haduh lai tylli ki mad jingdawa ha u CEM
Ka Jaiñtia National Council (JNC) mynta ka sngi kala leit ban ïa kynduh ïa u Chief Executive Member (CEM) ka Jaiñtia Hills Autonomous District Council (JHADC) ha ophis treikam jong u, ha kaba ka seng kala ïoh ban pynsngew halor ka jingïoh ujor na ki briew ka Elaka Sutnga bala don kiba register Land Holding ïa kawei ka jaka kaba heh haduh 21 lak square Meter tam.
Na ka liang u President ka seng u ma Sambormi Lyngdoh hadien ka jingïakynduh bad u CEM ban ïoh jingshai khambniah ïa kane, ula pyntip katkum ka bor jong ka JHADC ka lah ban issue Land Holding tang hapoh 1 lak square Meter bad kane jingleh tam kala buh haka jinglyngngoh ïaki nongïalam ka seng, da kaba kyntu ïa u CEM ban thung noh da ka Survey Committee bad ban teh lakam ïa kane ka jingïoh LHC katei ka jaka.
Ka seng kala kren shai lada ka Council kam lah ban shimkhia ïa kane ka jingdawa, na ka liang ka seng kam banse ban ujor syndon da ka PIL sha ka ïing bishar badon burom.
Shuh shuh ula pynsngew hadien ka jingïakynduh bad u CEM ka seng kala ïoh ban ïakren ïa ki lai tylli ki mat kaba nyngkong halor ka Resolution kata ban ithuh noh ïa ka ktien Pnar bad ïa kane u CEM ula pyntip ba la dep ban pdiang ïa ka hapoh ka ïing dorbar. Hynrei kane ka kam ka dang sah teng hapoh ka tnad Law Department jong ka sorkar jylla.
Kaba ar ka seng kala dawa ban ithuh noh ïaka Elaka Labang Nongphyllut hapoh ka JHADC namar ïa u Acting Dolloi la dep ban thung, hynrei haduh mynta kitei ki shnong na katei ka Elaka kim pat wan ban shim sanat naka Council.
Ka mat kaba lai ba ka seng kala ïoh ban ïakren ha kaba ïadei bad ka rukom ai jait katkum ka riti Dustur, halor kane u CEM ula pynsngew ha ki nongïalam ka seng ba ka JHADC kala dep pynkhreh ïa ka aiñ bad kane ruh ka dang sah teng hapoh ka Customary Law Committee jong ka JHADC bad u CEM ula pyntip ba shen yn sa pyntreikam noh ïaka.