Ka Dr. Mazel Ampareen Lyngdoh kaba dei ruh ka myntri sorkar ka ban ïakhun ïa ka Election Member of Parliament (MP) naka 1-Shillong Parliament Constituency naka seng National People’s Party (NPP) mynta ka sngi kala wan hiar sha Jaiñtia ha ki ar tylli ki Constituency ha 1-Nartiang bad ha 2-Jowai Constituency.
Kane ka myntri kala leit hiar nyngkong ha shnong Wahiajer haka jingïalang bala pynlong ha Wahiajer Community Hall, ha ka jingsynran lang naduh u Symbud Myntri RangbaH ma Sniawbhalang Dhar, u MLA ka Jowai ma Wailadmiki Shylla uba dei ruh u State Working President, ka kong Santa Mary Shylla (MLA), u CEM ka JHADC ma Thombor Shiwat, ki MDC, ki Waheh Shnong, ki President, Secretary bad ki Leader ka Party na ka 1-Nartiang Block.
Ïa ka jingïalang la pynïaid da u ma Hamkom Khyriem President ka 1-Nartiang Block uba la pdiang sngewbha ïa baroh ki nongwan sha kane ka jingïalang ba nyngkong jong ka Dr. Ampareen da ka jingkyrmen skhem lyngba kane ka jingïalang ka Party kan dang ïoh bor ban trei shitom met bad mynsiem ha kine ki sngi ban wan na ka bynta ka jingpynkhreh ïa ka Election MP.
Ka kyrtong MP ka Dr. Ampareen Lyngdoh haka jingkren kala pynpaw ka jingsngewnguh lyngba ka jingïaid lynti jong ka ha ka kam seng saiñ hima sima kaba la sdang na ka ïing ka sem kata naduh u kpa jong ka bad ka long ka ïing kaba dang bteng haduh kine ki sngi ban ai jingshakri ïa ki paidbah naduh ka snem 1972.
Kala ong ha kane ka jingïakhun mynta ka kynti kan hap ban leit mih sha baroh ki 36 tylli ki Constituency, kala pynsngew ba ka jingmih jong ka shakhmat ban ïakhun ïa kane ka election MP ka dei lyngba ka jingai mynsiem jong u ma Sniawbhalang Dhar (MLA) ba shim ïa kane ka rai.
Kala pynsngew kumba long mynta ki District Council hapoh ka jylla kiba duh bor haduh katta katta, tang na ka daw ka jingbym treikam jong ki MP ban pynsngew sha ka sorkar kmie halor ki skim bapher bapher bad kala kular ban trei shitom katba lah ynda kan wan ha ka jingjop.
Kala ong kiba bun ki paidbah ki phah ïa ki MP kiba khlem da puson bha ïa ki kam ba ki trei bad kim juh kren eiei ïa ki skim jingïarap kiba wan na ka sorkar kmie kum ki tyndong Gas, ki lad jingkoit jingkhiah ban ïoh jingsumar na ki hospital, ki skim ïing ba duk, ki Scholarship bad kiwei de nalor ka jingslem ban ïoh ïa ka ILP namar ïa kine lah ban ïakren hapoh ka ïing Parliament ka Ri.
Kala kular shen kan sa wan biang hapoh kane ka Constituency ha ka shnong Mookyndur WJHD ban plie paidbah ïa ka jaka sumar (AYUSH) kaba kot 10 klur tyngka.
U ma Sniawbhalang Dhar ha ka jingkren ula kyntu jur ïaki nongïalam ne ki Leader ka 1-Nartiang ban kin treishitom da ka jingïatylli naka bynta kane ka jingïakhun MP bad ban pynjop don burom ïa ka kong Ampareen.
Ula pyntip ruh shen kin sa lum ïa ka jingïalang na ka bynta ki kynhun bapher bapher naduh ki nongïalam shnong, ki nongïalam jong ki seng kynthei, samla, ki kynhun treimon sngewbha, ki nongïalam ñiam nalor kiwei de ban ïakren bha ïa kane ka kam na ka bynta ka kyrtong MP jong ka seng NPP.
Ha ka por janmiet ka kong Ampareen kala leit hiar sa ha Jowai ha ka jingïalang ba la pynlong ha Ladthadlaboh Indoor Hall ban pynlong ïa kane ka juh ka jingïalap Election.
