Ka ophis jong ka District Tuberculosis Officer ryngkat ka jingiatreilang bad ka Star Cement kila pynlong ka jingsam jingbam sha ki 27 ngut ki nongpang TB ha ka prokram kaba la pynlong ha Pamra Paithlu PHC, East Jaintia Hills District mynta ka sngi (9.2.24).
Kane ka jingsam jingbam ka long shi bynta na ka jingpynsngewthuh paidbah halor ka prokram National Tuberculosis Elimination Program bad ka prokram thymmai Pradhan Mantri TB Mukt kaba dei ka prokram ban pynduh jait ia ka jingpang TB napoh ka ri India.
Ha kane ka prokram la iadonlang i District Tuberculosis Officer cum DM&HO West Jaintia Hills District i Dr. EBV Laloo, i Medical Officer ka Pamra Paithlu PHC Dr. G. Chyrmang bad u Manager ka Star Cement Limited Lumshnong u Kingshok B Borah, ki nongtrei jong ka NTEP bad jong ka PHC.
I Dr. Laloo ila batai shaphang ki skhim bapher bapher kiba pynioh da ka sorkar sha ki nongpang TB hapoh ka por jong ka jingshah sumar jong ki. Ka don ruh ka jingpynioh pisa lyngba ka skhim Mishay Poshan Yojana Rs.500/- sha man la iwei pa iwei na ki nongpang TB kiba la dep ban register hapoh katei ka skhim tad haduh ba la kut ka jingshah sumar jong ki.
Ha kane ka sngi la sam ia ki marbam ba kynthup ia u Khaw, ka Umphniang, ki Pylleng bad kiwei kiwei ki jingbam tei met sha ki 27 ngut ki nongpang.
