Hadien ka jingioh jingujor na ki bor shipai BSF halor ka jingjyllei ka jingkhaïi beaiñ ia ki mar ba kynthup ia u Kwai, ki ktung, ki biri, sikaret, ki mrad ba kynthup ia ki masi bad kiwei de, nalor ka jingrung jingmih beaiñ jong ki briew lyngba ki khappud kaba shait jia ha ki por mynmiet, na ka liang jong u District Magistrate ka West Jaiñtia Hills u bah B.S. Sohliya, IAS, ula pynjari da ka kyndon 144 CrPC ban teh lakam ne khanglad ia kane ka jingleh beaiñ.
Katkum kane ka hukum la khang pyrshah ia ka jingleit tur jong ki paidbah sha ki bynta khappud bad ka ri Bangladesh, kiba don jingthmu ban jam sha shiliang ka ri India ne kiba thmu ban wan rung shapoh India.
La khang ia ka jingiaid ki paidbah la ka dei da ka kjat ne da ki kali naduh ka por 6 baje janmiet haduh ka por 5 baje mynstep hapoh ka jingjngai ba 5 Km na khappud.
La khang ia ki paidbah ban khaïi beaiñ ia ki mrad bad kiwei pat ki mar kum u kwai, ki biri, sikaret, ki ktung, ki slasha bad kiwei kiwei de ki jait mar.
La khang ruh ba ka jingpynlong ia ki ïew ki hat ne ka jingplie ia ki dukan hapdeng ka 8:00 PM haduh 6:00 AM ha ki bynta ba jngai 1 KM na ki khappud bad ka ri Bangladesh.
Kane ka hukum kan treikam mardor ha baroh ki bynta jong ka West Jaiñtia Hills District naduh ba la pynmih ia ka mynta ka sngi 9.2.2024 tad haduh ban da pynmih da kumwei pat.