Ka Federation of Khasi-Jaiñtia & Garo People (FKJGP) War Jaiñtia Circle ka pynpaw ka jingsngewkmen kaba khraw hadien ba ka sorkar lyngba ka tnad PWD Roads NH-206 kala pynurlong ïa ka jingdawa jong ka seng ban wan maramot biang ïa u surok ba dang dep trei ha u snem 2023 naduh Nongtalang shaduh Dawki uba jngai tang 14 kilo meter eiei.
Kane ka dei ba hadien ba ka seng kala ïohi dala ki jong ki khmat tang hadien 3 bnai eiei ba kila dep pyntrei (siang rong) ha u snem 2023 hynrei une u surok ula sniew bad pei thliew baroh shi lynter.
Kumta na ka liang ka seng ha ka 5 tarik u Naitung, 2023 kala leit ban ïa kynduh ïa u EE PWD Jowai Central Division, West Jaiñtia Hills District ha ophis treikam jong u ha Jowai da kaba buh jingthoh (complaint) ba dei ban maramot biang ïa une u surok.
Na ka liang ka u EE bad ka tnad PWD ha kane ka jingïa kynduh kila kular ban maramot biang ïa une u surok hakhmat ka seng.
Halor kane ka seng lyngba u kyrwoh na u President Bahshlur Mukhim ka ai khublei kyrpang ïa ka tnad PWD bad ïa ka Dhar Construction Company (DCC) kiba la shim khia ban pyndep ïa une u surok haka 5 tarik u Rymphang, 2024.
