Ïa ka rynsan 3rd East Jaiñtia Got Talent-2024 bad Miss Divine Beauty Pageant kaba pynlong ha ki ar sngi lynter, ha Rymbai Iawpyngsing East Jaiñtia Hills District da ka East Jaiñtia Hills District Youth Development Society, Rymbai, la pynkut noh ha ka janmiet jong ka 10 tarik mynta u bnai.
Ha ka 9 tarik la pynlong ïa ka East Jaiñtia Got Talent, ha kane ka rynsan u samla Rimiki Thoo u la pynpaw pyrthei ïa ka sap rwai bad u la ioh rah ïa ka nam lahduh, kumjuh ruh ka samla Rimika Bareh, na shong Rymbai ka la pynpaw ïa ka sap rwai bad ka la wan ba ar katba ka samla Buhmon Jooh na ka shnong Iongnoh, West Jaiñtia Hills District kala pynpaw ïa ka sap shad bad la wan ha ka kyrdan ba lai, ki nongjop kila ïoh ban khur ïa ka song pisa lem bad ki syrnot. U kongsan ha kane ka sngi u dei u bah Jackie Khontiang.
Ha ka janmiet jong ka 10 tarik pat la pynlong ïa ka Miss Divine Beauty Pageant-2024 ha kaba u bah Afasting Nongtdu u la long u kongsan. Ha kane ka rynsan iakop thei bhabriew, ka samla Risaka Phawa na ka shnong Tuberkmai Shnong ka la rah ïa ka nam lahduh bad ka samla Fortunate Dkhar na ka shnong Ïongkaluh ka wan ha ka kyrdan ba ar katba ka samla Lizamary Shylla na Byndihati ka la wan ha ka kyrdan ba lai, ïa kitei ki lai ngut ki thei samla kiba jop la pynkup burom da ka khung pisa bad ki syrnot.
Ki nongialam jong ka East Jaiñtia Hills District Youth Development Society, Rymbai ba kynthup ka President, ka kong Alagrity Bareh, General Secretary, i kong Btinmame Bareh bad u Chief Adiviser, u bah Deibormi Syad, ki la ong ba kane ka rynsan ka long ban iarap ban kyntiew bad ruh ban pynpaw pyrthei ïa ki sap ki phong jong ki khun samla jong ka thaiñ bad sngew tynnad ruh ban tip ba ki la bun ki samla ka thaiñ ki la mih shakhmat lyngba kane ka Society ha kaba kiba bun ki samla ki la lah ban kynjoh shuh shuh sa sha kiwei kiwei ki rynsan ba kham heh ruh lyngba ka jingiarap lang kane ka Society, ki khmih lynti ba kin sa nang buh ki samla ki ban paw pyrthei lyngba kane ka Society kaba na Rymbai, East Jaiñtia Hills District.