Mynta ka sngi u Prime Minister ka ri u Narendra Modi, ula pynbna ba la pyllait ia ka skhim ba kyrpang ha kaba iadei bad ka jingpynioh bording lyngba ka sngi ka ‘Rooftop solar scheme for free electricity – PM Surya Ghar Muft Bijli Yojana’.
U PM u la ong ban ioh ia ka jingroi kaba neh bad ka jingbha ia ki nongshong shnong, ka sorkar kala pyllait ia kane ka skhim PM Surya Ghar: Muft Bijli Yojana. Kane ka projek ka don ka jingmang tyngka kaba palat ia ka Rs.75,000/- klur tyngka da ka jingthmu ban pynioh bor ding sha ki 1 klur tylli ki longïing da ka ba pynioh haduh 300 Unit ka bor ding khlem jingsiew manla u bnai.
Khnang ban pyntip paidbah shuh shuh ia kane ka skhim shaduh ki kyndong kynshrot ka sorkar kan sa bthah ia ki Dorbar Shnong ha sor bad nongkyndong ban pynshlur ia ki nongshong shnong ban buh ia ki ‘Rooftop solar system’ ne ki solar kiba shait buh halor tnum ïing ban ioh ia ka bor na ka sngi.
Lyngba kane ka skhim kan iarap ban kyntiew ia ka ioh ka kot, ban pynduna ia ka bai bill lait bad ha ka juh ka por ka iarap ruh ban pynioh kam ia ki samla, ong u Modi.
Kumta u Modi ula khot bad kyntu ia baroh ki nongshong shnong jong ka ri India ban pynkhlaiñ ia kane ka – Surya Ghar: Muft Bijli Yojana da kaba aplai ia kane ka skhim lyngba ka website- pmsuryaghar.gov.in