Ki nongialam shnong ba kynthup ia ki Waheh Shnong ba katto katne ki nongshong shnong jong ka shnong Nongsning bad Umrasong ha ka 13 tarik mynta u bnai ki la leit ban ia kynduh bad aiti syndon da ka jingujor halor ka jing ai license ia san tylli ki coke plants kiba kyrteng ka M/S M M Minerals, M/S Unique Industry (2nd Chimney), M/s Presidium Breez, M/s Magic Coke bad ka M/S Ioanis Industries Private Limited (Chimney 2) kiba don hajan jong kine ki shnong khamtam ha kaba iadei bad kawei na ki coke plant kaba kyrteng M/S Presidium Breez kaba la pynjulor ia ka tyllong um dih jong ka shnong Nongsning.
Na ka liang ka Dorbar Shong Nongsning ha ki por ba la dep kaba la buh ia ki jingujor la bun bun sien naduh u snem 2022 sha u Deputy Commissioner ka East jaintia Hills bad kiwei kiwei ki Department ba dei khmih ia kane ka kam ba ym dei ban ai license ia kine ki coke plant namar ki pynjot ia ka lyer bad mynta ia ka tyllong um kaba baroh ki nongshong shnong jong kane ka shnong ki juh pyndonkam. Hynrei ki nongshong shnong ki kyndit ban iohi ia jingsdang pyntrei biang ia kine ki coke plant ha kine ki sngi wat hapdeng ki jingujor bad jingiakhih pyrshah ban ai license ia kum kine ki karkhana.
Lah ioh jingtip ba ha u snem 2023 kine ki coke plant ki lah ioh licence ban tei ha kane ka shnong. Kane ka pyni ba ka sorkar kam suidñiew ban sngap ia ka jingud u paidbah bad ka lah pynlong aiñ ia kine ki karkhana beaiñ. Da ka mynsiem ba sngew diaw ia ka jingbym sngap ka sorkar bad jingud u paidbah ha kane ka sngi ha ka jingdon ryngkat lang u Ma Dipsing Bareh, Waheh Shnong Nongsning, u Ma Elias Tlang, Waheh Shnong Umrasong, U Ma Maniwel Suja nongshnong ka Nongsning, U Ma Reading War, Advisor ka ECC ryngkat ki Secretary Shnong ki la leit iakynduh markhmat ia u Member Secretary ka MSPCB ban pan jingshai halor kane bad ba un peit bniah ia kane ka kam bad ban ai jubab hapoh une u bnai.
Lada ka MSPCB kam lah ban tehlakam ia kane ka jingeh, ki nongshongshnong kim banse ban hap ban shim pat daka wei ka rai kaba tyngeh la ong u Ma Dipsing Bareh Waheh Shnong Nongsning. Lada ngi duh ia kine ki tyllong um kan wanrah ka jingeh kaba khraw ia ki nongshnong snong namar ki dei tang kine ki tyllong um ba lah ban pyndonkam la bynrap u Ma Maniwel Suja, u nongshnong ka Nongsning.
Ia ka jingujor la phah kopi ruh sha u Myntri ka sorkar jylla ba dei peit ia ka tnat Forest and Environment.