U Symbud Myntri Rangbah jong ka sorkar jylla u ma Sniawbhalang Dhar lyngba ka ophis Director of AYUSH mynta ka sngi 24 tarik u Rymphang 2024 ula plie paidbah ïa u mawnongrim ban tei ïa ka AYUSH Hospital kaba la kot kumba 10 klur tyngka kaba don 30 jingthiah ha ka shnong Mookyndur, West Jaiñtia Hills District.
Ha kane ka sngi la wan ban ïa donlang da ka myntri ka koit ka khiah jong ka sorkar jylla ka Dr. Mazel Ampareen Lyngdoh, ma Wailadmiki Shylla, u Dr. Joram Beda, IAS Commissioner & Secretary, jong ka tnad ka koit ka khiah uba dei ruh u Director of AYUSH & Member Secretary Meghalaya State AYUSH Society, ka DM&HO WJH Dr. E.B.V. Laloo, u Deputy Commissioner ka WJH bah B.S. Sohliya, ki ophisar, ki nongïalam shnong bad ki paidbah nongshong shnong nalor ki khynnah skul.
U ma Sniawbhalang Dhar haba ai jingkren ula pynsngew ka jingdon kum kine ki Hospital AYUSH kan ïarap shibun eh ïa ki nongpang ban ïoh ïa ka jingsumar ba bha, ula ong kane ka long ka sngi ban buh ïa u Mawnongrim bad kyrmen skhem ban pyndep ha ka por kaba biang khnang ban ïoh buh sa u mawnongrim ban plie ïa ka Hospital.
Ula ai ka jingïaroh ïa ka myntri ka kong Ampareen kaba la trei shitom ban pynïaid shakhmat ïa ki kam pynroi khamtam ha ka liang jong ka koit ka khiah, ula ïathuh ba ka sorkar kala ïaleh ban wanrah ïa ki skim bapher bapher lyngba ka jingïalam u Myntri Rangbah ka jylla u Conrad K Sangma, hynrei ula ong ba kane ka sorkar ka long kaba trei ïa ka kam bad dei na kane ka daw ki don shibun kiba kynthoh ïa ki kam jong ka sorkar.
Ula pynsngew ba ka sorkar MDA-II kala dep sanction ha kane ka dorbar mang tyngka na ka bynta ki ïing baduk kiba don haduh 1 lak 40 hajar tylli ki ïing kaba yn duna ïa ka 1700 klur tyngka, ula ong ha baroh ki 12 tylli ki District ka sorkar ka la pynïoh ïa ki kam pynroi khlem da ñiew shilliang katkum ka jingbthah jong ka sorkar kmie.
Ha kaba ïadei bad ka New Shillong u ong ka Sorkar kala dep ban mang pisa dang ha kane ka dorbar mang tyngka kaba la kot sha ka 5 hajar klur ban pynurlong noh ïa ka jingphohsniew kaba la slem bha jong ki paidbah.
Ka kong Ampereen kala ong kane ka Hospital kan ai jingsumar kyrpang ïa ki nongpang da ki Doctor kiba la dep pule AYUSH bad kiba tip shaphang ki dawai kynbat nalor ka jingdon ki Nurse, ki nongpang ki lah ban ïoh jingsumar ha ka liang ka koit ka khiah naduh ka jingpang BP, Shini, jingpang shyieng, jingpang bampong nalor kiwei de.
U Dr. Joram Beda ha ka jingkren ula ong ka jingtei ïa kane ka AYUSH Hospital ka lah ban ai jingsumar kaba bha tam hapoh ka jylla, da kaba ula ai khublei kumjuh ïa ka sorkar hapoh ka jingïalam u Myntri Rangbah u Conrad K Sangma bad ki Minister bapher bapher.
Katba na ka liang ki nongïalam shnong ka Mookyndur kiba pynsngew ba ka shnong kala ai ei ïa kane ka jaka kaba heh haduh 5 acre ban tei ïa kane ka Hospital AYUSH, ha kaba ka Dorbar Shnong ka la pynpaw ka jingsngewnguh kaba khraw eh ïa ka sorkar ban wanrah ïa katei ka jaka sumar ha ka liang ka koit ka khiah hapoh ka shnong bad hapoh ka Ri-Lum Jaiñtia hi baroh kawei.
