Ka Reserve Bank of India (RBI) lyngba ka Working Group (WG) jong ka, ka la lap ba ki don kumba 600 tylli ki apps kiba tyrwa ban ai ram sha ki paidbah kiba long beaiñ hapoh ka ri India. Kine ki apps ki dei kiba lah ban trei kam lyngba ka online na ka bynta kito kiba pyndonkam ia ki Androids phone.
Hadien ka jingioh jingujor ba man la ka por ka RBI kala thaw noh ia ka Working Group (WG) ha ka 13 tarik u Kyllalyngkot mynta ka snem, na ka bynta ban khmih bniah halor kine ki company leh thoh kiba kular ban pynioh ram sha ki paidbah ka ri.
Katkum ki jinglap jong ka WG ki don kumba 1100 tylli ki apps kiba ai ram sha ki paidbah, hynrei napdeng kine ki don haduh 600 tylli kiba long beaiñ bad kiba lah ban shukor ia ki paidbah. Kumta halor kane ka RBI ka maham ia ki paidbah ba kim dei ban ngeit kulmar ha kum kitei ki apps khlem da pynshisha shwa ia ka tynrai jong ki.
Kine ki apps ba long beaiñ ki buh jingma na ka bynta kito ki briew kiba aplai loan lyngba jong ki.
Katkum ka jinglum jingkhein jong ka RBI ki la don haduh 2562 tylli ki jingujor na kylleng ki bynta jong ka ri India kiba la poi sha ophis jong ka, tang naduh u bnai January 2020 haduh u bnai March 2021.