Ka Reserve Bank of India (RBI) kumba ju long man la u snem naduh ba la sdang ia ka FLW naduh u snem 2016, mynta ka kynti ruh kala pynlong ia kne ka prokram ba la tip kum ka Financial Literacy Week (FLW), halor ka phang “Make the Right Start: Become Financially Smart” kaba batai shaphang ka jingtip ban kynshew kyndiap bad ka bor ban pynroi ia ka pisa, ka jingdonkam ia ki khynnah skul ban pyndonkam ia ka Bank bad ka Digital and Cyber Hygiene.
Ia kane ka prokram la plie pyrda mynta ka sngi da u Chief Secretery ka sorkar Jylla u bah D.P. Wahlang ha ka jingiadonlang u bah Olden Nongpluh, GM (O-i-C), RBI Shillong, u Prabhudatta Sahoo, GM (O-i-C) NABARD; u Ashish Yadav, Chairperson, MRB; Sh. Amit Kumar,DGM, SBI; u Osmand Nongbri, MD, MCAB; nalor kiwei de ki heh sorkar bad ki nongtrei Bank hapoh ka jylla. Ia kane ka prokram yn pynkut haduh ka 1/3/2024.
Ia kane ka prokram sdang la pynlong ha Taj Vivanta, Shllong bad kan neh baroh shitaiew lynter, ban ai ka jingpynsngewthuh sha ki paidbah.
U bah D P Wahlang, ula iaroh shi katdei eh ia ki jingshimkhia jong ka RBI ban kyntiew ia ka jingtip shaphang ka rukom kynshew kyndiap ia ki nongshong shnong jong ka Jylla Meghalaya. Ula buh ruh ka jingkyntu ia ki Bank ba ki dei ban pynkhlaiñ ia ka jingtreikam jong ki da kaba poi shaduh ki kyndong kynshrot ne ki shnong kiba sha nongkyndong eh jong ka Jylla. Ula kdew ruh ia ka jingshim khia jong ka sorkar Jylla ban ai ka jingpynsngewthuh sha ki paidbah halor kane ka juh ka phang.
Kum shi bynta na kane ka jingrakhe ka RBI Shillong kan sa pynlong ia ki jingiakop dro dur na ka bynta ki khynnah skul bad samla pule College.
Kumjuh ruh ka RBI, Shillong kan sa ai ki jingpynshai paidbah lyngba ki TV, ki Radio, ki poster bad kiwei kiwei de. Ia kane ka prokram la don jingmut ruh ban pynlong ha baroh ki 12 tylli ki District jong ka Jylla.
