U Deputy Commissioner ka East Jaintia Hills District u A. Baranwal, IAS ula pynpaw ka jingiaroh ia ka ophis jong u General Manager ka District Commerce & Industries Centre (DCIC), East Jaintia Hills District halor ka jingshim jong ka ban ai lad ia ki nongsemkam lajong kiba don hapoh kane ka District ban pyni iala ki sap ki phong ba ki don, na ka bynta ban wanrah ka jingmyntoi ia ki.
Ia kane u Baranwal ula kren kum u kongsan ha ka jingplie ia ka iew iadie iathied ba 6 ne ka 6th District Level Inudstrial Exhibition kaba ar sngi kaba la pynlong ha Khliehriat East Parking Lot, Khliehriat.
U Baranwal ula buh ka jingkyntu ia baroh ki nongsengkam lajong ba kin shimkhia hala ki jong ki jong ki bynta ban pynlong ia ki mar jong ki kiba lah ban iakop bad kiwei pat ki mar ha kiwei pat ki bynta jong ka jylla. U la ong ba na ka liang jong ka sorkar jylla kala pyrshang katba lah ban pynioh ia ki lad jingiarap na ka bynta ban kyntiew ia ki nongsengkam lajong da kaba kin pyndonkam hok ia kaei kaba ka sorkar kala pynioh ia ki.
Kiwei de kiba la ai jingkren ha kane ka jingialang ki kynthup ia u General Manager, District Commerce & Industries Centre (DCIC), East Jaintia Hills, bah H.N Kharpuri, ki ar ngut ki Functional Managers, DCIC, bah G. Pala bad u bah P. Suja bad u nongioh bynta na ka PMEGP u ma D.Tlang.
Ha kane ka Exhibition kila don haduh 30 tylli ki kynhun kiba la wan ban iashim bynta, ha kaba u kongsan ula ioh ban leit jngoh ia kawei pa kawei hadien ba la kut ka jingialang. Kiwei de kiba la iadon lang ha kane ka prokram ki kynthup ia u District Project Manager (DPM), NRLM East Jaintia Hills District, ma K. Slong, ki Waheh Shnong, ki nongsengkam lajong bad kiwei de ki riew shimet.
