Ka Jowai Presbyterian Higher Secondary School, (JPHSS) Jowai, kum shi bynta na ka jingrakhe ia ka jinglehkmen Jubili Rupa jong ka skul ha ka jingaishakri ba la kynjoh sha ka 25 snem, mynta ka sngi kala pynlong ia ka Sports Meet jong ka skul.
Ha kane ka Spors Meet la wan ban iashim bynta da ki skul ba pyniaid ka Balang Presbyterian Jowai naduh ka LP School, ka UP School bad ka skul na ka shnong Iongnoh.
Kane ka Sports kaba la sdang naduh mynta ka sngi (27/02/2024) ha madan Kiang Nangbah Stadium, Ladthalaboh, yn pynkut ia ka ha ka 29/02/2024.
Ia kane ka Sports la wan ban plie pyrda da u Deputy Commissioner ka West Jaiñtia Hills District u bah B.S Sohliya, IAS.
Haba ai jingkren kum u kongsan u ba Sohliya u la ai khublei kyrpang ia ki nongpyniaid jong ka skul kiba la lah ban pynlong ia kane ka sports meet jong ki khynnah skul, kaba lah ban pynmyntoi shibun ia ki khynnah skul, khnang ba kin ioh ban pyni iala ki jong ki sap ki phong ba ki don ha ka liang ka sports. Ula buh ka jingkyntu ia baroh ki khynnah bad samla pule ba kin long kiba kiar na kino kino ki jait jingdih kiba sniew kynthup ia u drok, khnang ba kin lah ban jop ha ki jingpule jong ki. U la ai ruh ka jingsneng jingkyntu ia baroh ki khynnah skul ba kin long kiba don akor bad burom ha ka jingim bad ba kin long kiba minot thoh ha ki jingpule jong ki. Shwa ban pynkut ia ka jingkren u DC ula pynbna ba la sdang noh ia kane ka Sports Meet naduh mynta ka sngi.
Ha kane ka sngi la iadon ryngkat ki rangbah nongialam jong ka Balang Jowai Presbyterian ba kynthup ia ki Tymmenbasan ka Balang.
La ioh ia ka jingkrenpdiang sngewbha da ka Principal jong ka skul ka kong I. Lytan, ka jingpule Baibl bad duwai na kawei na ki nonghikai ka kong G. Bhoi.
La ioh ia ka jingbamsmai (oath taking) jong ki nongialehkai sports ba la ialam da ka khynnah skul ka Gifty Grace Sumer. La rwai ruh ia ka School Anthem ba la shim bynta da ki khynnah skul.
