Mynta ka kynti ka jingiaseng Synod Samla kaba 22 jong ka KJP Synod Mihngi, kan long ha ka Balang Presbyterian Moolang, jong ka Rymbai Presbytery, kaba hap hapoh ka East Jaiñtia Hills District.
Ia kane ka jingiaseng Synod Samla yn sdang naduh ka 1 tarik kaba dei ka sngi Thohdieng kaba dei ka sngi ban pdiang ia ki dkhot bad deligate, bad yn pynkut ia ka ha ka 3 tarik kaba dei ka sngi U Blei jong u bnai Lber mynta ka snem, ha kaba yn pynlong ia ka jingiaseng paidbah.
Ki nongpyniaid jong ka Synod Committee ba kynthup ia u Secretary ma Harvest Siangshai bad u samla Jespal L Pyrtuh uba dei u dkhot, haba ai jingkren sha ki nongthoh khubor kila pynpaw ia ka mynsiem pdiang sngewbha ia baroh ki nongwan sha kane ka jingiaseng Synod Samla ka ban long ha ka shnong jong ki.
Kila pynpaw ba ka Balang Moolang ka don tang 153 tylli ki longïing bad ki dkhot jong ka baroh ki don 855 ngut, hynrei da ka mynsiem kaba sngewieit ia ka kam U Blei ki kloi ban pdiang ia kane ka jingiaseng.
Ban poi sha ka shnong Moolang ki don ar tylli ki lynti, kawei ka dei kaba wan na ki thaiñ Ladrymbai bad ka don ia ka jingjngai kaba tang 5 KM na Ladrymbai haduh ka shnong Moolang. Kawei pat ka dei kaba poi na ki thaiñ Rymbai, Bataw, Suchen, bad na Khliehriat kaba jngai 15 KM.
Ban pynsuk ia ki nongwan jingiaseng ka Balang ka la dep ban pynbit pynbiang ia ki lynti ki surok ban poi sha ka jaka ba long jingiaseng, ryngkat ka jingiarap jong u MLA ka thaiñ ma Kyrmen Shylla. Ha ka juh ka por ka Balang ka la pynkhreh 7 tylli ki Parking Lot kiba don marjan hi bad ka jaka ba pynlong jingiaseng paidbah ha ka sngi u Blei.
Na ka liang ki bor pyniaid Balang kila pyntip ba yn ym shah ia kino kino ki nongdie jingdie la ka dei ka dukan ja dukan sha, ki dukan die kot bad kiwei kiwei ban die ha ka jaka ba long jingiaseng ne hapoh u pud jong ka shnong, namar ba kane ka pynthut ia ka leit ka wan jong ki nongwan jingiaseng.
Ka Balang ka khmih lynti ba ki nongwan sha ka jingiaseng kin wan da kaba suk bad kin leit phai ruh da kaba suk, hadien ba kila ioh ban mat ia ki jingbam ba kynja mynsiem bad kin pynkdang pat ialade da ki jingbam met ia kiba la pynkhreh da baroh ki longïing jong ki dkhot ka Balang, khlem kano kano ka jingtieng jingsyier mynsiem, pynkut kitei ki ar ngut ki rangbah.
