U Myntri ka tnat Social Welfare bah Paul Lyngdoh ha ka jingiadon ryngkat jong ka Myntri ba khmih ia ka tnat Aiñ ka Dr. M Ampareen Lyngdoh mynta ka sngi ula pyllait paidbah ia ka kot bala pynkylla sha ka ktien Khasi “Ki kyndon ain” jong ka POCSO Act 2012 ha ka jingialang kaba la pynlong ha Pinewood Hotel Shillong.
U bah Paul ula pynkynmaw ba ka aiom ksiar jong u briew ka dei ka por jinglong khynnah, kumta ka pynkmen ia u ban ioh iadon bynta ha kane ka sngi kaba la pyllait ia kane ka kot aiñ kaba long ka jingiada ia ka hok jong ki khynnah kaba la ioh ban pynkylla sha ka ktien Khasi.
U la ong ruh ba kane ka sngi mynta ka long ka sngi sah kynman ha ka histori jong ka jaidbynriew namar naduh bala ioh ia ki dak thoh Khasi naduh u snem 1841 dei mynta ka sngi la lah ban pynmih ia ka jingthoh ha ka Ktien Khasi ia ka aiñ POCSO kaba la treikam mynta la shiphew snem kynthih.
U bah Paul u la khot ia baroh naduh nongthaw aiñ, ki nongpynkylla ktien, ki kmie ki kpa bad ki nongialam niam bad long kiba don ka jingkitkhlieh bad ban pynthikna ia ka jingiada ia baroh ki khun ki kti ban lait na ka jingshah thombor.
U la ong ruh ba ka jingdon jong kane ka kot aiñ kaba la pynkylla sha ka ktien Khasi kan iarap ban poi sha ki thliew ïing jong baroh ki shnong sha ki thaiñ nongkyndon ba kin ioh tip ia ki aiñ kiba iadei bad kane ka POCSO. Ha kane ka prokram ka Meghalaya State Commission for Protection of Child Rights kala pyllait ia ka Calendar bad ka Report ha kaba iadei bad ki case POCSO kiba la rah hapoh ki ïing Bishar jong ka Meghalaya.
