Ka sorkar jylla mynta kala thaw ia ki ar tylli ki Committee kiba la tip kum ka State Monitoring Committee bad ka District Monitoring Committee, kine ki Committee kin peit thuh ia ka rukom pynmih ia ki khubor lyngba ki Local TV channel, kat kum ka Cable Television Network (Regulation) Act, 1995.
Ka State Monitoring Committee kan kynthup ia u Commissioner & Secretary / Secretary, Information & Public Relations Department kum u Chairperson bad u Director of Information & Public Relations kum u Member Secretary nalor ki wei de ki dkhot.
Ka kamram jong ka State Monitoring Committee ka long ban peit la dep ne em ban thaw ia ki District/Local Committee, ban peit ba kine ki Committee kin pynlong ia ka jingialang man la ka por, ban peit la ki ophisar kiba la thung ki trei hok ne em ia la ka kamram, ban shimti ia ki case lada don kano kano ka jinglehbakla jong ki Cable Operator. Kan ai jingmut ruh ia ki District Level Committee bad ka phah jingtip ruh sha ka tnat Ministry of Information & Broadcasting, Govt. of India ban ai ia ka rai halor kano kano ka jinlehpyrshah jong ki Cable Network la ka dei ha ki prokram jong ki ne ki Advertisement.
Ka District Monitoring Committee (DMC) kan kynthup ia u Deputy Commissioner jong kano kano ka District kum u Chairman/Chairperson bad u Assistant Director of Information & Public Relations kum u Member Secretary nalor kiwei de ki dkhot.
Ka kamram jong kane ka DMC ka long ban ai lad ia ki paidbah ban ujor pyrshah ia ki Cable TV lada ki pynmih ia kaei kaei kaba long pyrshah ia ka aiñ Cable Television Networks (Regulation) Act, 1995. Kin hap ban khmih bha ruh halor ki prokram bapher bapher kiba la pyni ne pynmih lyngba ki Local TV channel. Lada lap ia kano kano ka jingleh pyrshah ka DMC kan hap ban ai jingtip mar mar sha ka Sorkar jylla bad ka Sorkar pdeng.