Ka Lutituber Ialong SC mynta ka sngi ka la pynliem da 4-3 kol ia ka Ksehsylle Ialong SC lyngba ka jingiashut ‘Tie Breaker’ ha ka lympung ialehkai phutbol ‘Quarter Final’ jong ka “Open to all 18 Above Football League Knockout Tournament-2021 ba la pyniaid da ka West Jaiñtia District Sports Association (WJDSA) ha Kiang Nangbah Stadium, Jowai.
Ha ka jingiakhun jong ka kylla step bad ka kylla miet baroh ar liang ki la lah ban pynneh da mar 2 kol, haduh ba la hap ban pyniakhun da ka Extra Time bad ha kane ka Extra time kitei ki ar kynhun kiba la ioh ban thep mar shi kol bad kane ka jingiakhun ka la kut da 3-3 kol.
Ia kitei ki kol na ka Lutituber Ialong SC la ioh ban thep da u Ribait Lhuid ha ka minit kaba 11, u Nidaia Dhar ha ka minit ba 48 bad u Baiahluti Dhar ula thep kol ha ka minit ba 92. Katba na ka liang jong ka kynhun Kseh Sylle Ialong SC ki player kiba la thep kol ki long u Nangtei Mulieh ula ïoh ar kol marwei ha ka minit ba 31 bad 65 bad u Rima Lyngdoh ula thep ha ka minit ba 98.
Hadien kane ki bor pyniaid kila hap ban pyniakhun noh da ka jingiashut ‘Tie Breaker’, ha kaba ka kynhun Lutituber Ialong SC kala jop ia ka Kseh Sylle Ialong da 4-3 kol.
Ka jingiakhun lashai ka sngi (25.11.21) ‘Quarter Final’ kan long hapdeng ka Pasyih Cultural SC pyrshah ia ka Caroline SC ha ka por 1 baje nohphai sngi, katba ka jingiakhun kaba la mut pynlong ha ka 26 la pynkynriah noh sha ka 27 tarik hapdeng ka Mukhla Raij pyrshah ia ka Newhills SC.