Ka Synjuk ki nonghikai Meghalaya Upper Primary school Teachers Association (MUPSTA) Garo Hills Region kan pyllong ia ka Mass Teachers Meeting ha ka 3 tarik u Nohprah 2021 ha Asanang, Tura, West Garo Hills ban pan ia ka jingmynjur jong baroh ki nonghikai Upper Primary skul ban pynlong syndon da ka jingiakhih kaba tyngeh tad haduh ba ka sorkar kan pynurlong noh ia ki jingdawa jong ka seng, kata ban kyntiew deficit noh ia baroh 844 tylli ki adhoc Upper Primary skul kiba don ha Meghalaya.
Ka seng ki nonghikai skul MUPSTA ka pynpaw ia ka jingsngewdiaw shikatdei eh ia ka jingkuman bad leh kyllain jong ka sorkar Meghalaya ia ki jingdawa jong ka seng ban kyntiew deficit pura noh ia baroh ki UP skul. Ha ka jingshisha, u CM ba donburom jong ka sorkar Meghalaya u Conrad K Sangma u la kular ban kyntiew deficit noh ia baroh ki adhoc UP skul ha Meghalaya ha ka Teachers’ Conference kaba la long ha Asanang Tura West Garo hills ha u snem 2018. Phewse baroh kine ki jingkular ki khlem ler kam satia haduh mynta.
“Katkum ba paw na ki dak ki shin ngi iohi ba ka sorkar ka ialeh ban kiar ia ki nongialam jong ka seng haduh ba wat tang ban ia kynduh ia u CM ruh u khlem ai por satia” la pynpaw ki nongialam ka seng. Ha ka jingiakynduh jong ka seng ia u Commissioner Finance ha Secretariat ha ka 17th Nov 2021 ban twad jingmut ha ka jingiadei bad ki jingdawa jong ka seng, hynrei ka jubab ba u la ai ka long ka bym sngewtynnad satia ha kaba u la ong lada ngan approve ne sign lut ia baroh ki proposal kiba wan sha ka miej, ka sorkar Meghalaya kan sa kylla bankcrupt lut.
Kane ka long katkum ka khubor bala phah da u S.R. Marak, Vice President MUPSTA-Central Body & PRESIDENT MUPSTA GHR