Mynta ka sngi ka All Jaintia Environmental & Social Welfare Society (AJESWS) ha ryngkat ki bor pyniaid shnong jong ka Shnong Ksehrynshang kila leit ban pynieng da ka Signboard ha ki bynta jong ka Wah Mynriang kaba don ha Ksehrynshang ban pyntip sha ki paidbah baroh ba kane ka bynta jong ka Wah Mynriang kan dei noh ka jaka pynneh pynsah ia ki dohum dohwah (Fish Sanctuary).
Ia kane ka jingthmu ka Society ryngkat bad ki bor pyniaid shnong la dep ban shim rai naduh kine ki bnai bala dep bad dei mynta ka sngi la ioh ban pynieng da ka Signboard, khnang ban lah ban teh lakam ia ka jingpyniap pathar ia ki doh um doh wah hapoh kine ki bynta kiba don hapoh ka jingpeit jingkhmih jong ka shnong Ksehrynshang.
Ha kane ka jingleit pynieng Signboard ha katei ka Wah la long kongsan da u Waheh Shnong ka Ksehrynshang u ba dei ruh u Adviser jong ka Society u ma Leader Papiah. La iadon ryngkat u President ka Society ma J. Dkhar, u Vice President R. Muskor, u President ka West Jaintia ma S. Dkhar, Asst. Secy. Ma T. Nongtdu, Sport Secy. Ma E. Nongtdu, Secy. West Jaintia ma P. Muliar ryngkat bad ki dkhot jong ka seng.
Na ka liang jong ka Society ka kyrpad ia baroh ki paidbah ban iatrei lang khnang ba ki jingthmu jong kane ka Society bad ka Shnong kin long kiba jop.
