U Dr. H. Carehome Pakyntein u long uwei na ki Kabiraij ne u Nongai Dawai Khasi-Pnar (Traditional Healing services) uba pawkhmat ha Rilum Jaiñtia. La kha ia u ha ka 25 tarik Nohprah (December) 1962, ha Dulong Jowai, kawei na ki Dong ne ka shnong hapoh ka Sor Jowai. U dei u khun jong ka Kong Helina Pakyntein bad Woh (Late) Kendro War Passah.
Ki kmie ki kpa kiba ñiewkor ia ka jingnang jingstad bad la phah skul ia u naduh dangrit dang kumba 4 snem shiteng ha Lower Primary School Dulong. Hadien ba u la pyndep ia ka jingpule Primary (Class III) ha Dulong la phah skul ia u ha Marianhill Secondary School bad hadien ba u la passed Matric na Marian Hill, u la sangeh noh ban bteng ia ka jingpule kaba kham shalor.
Ki Ma, ki Woh jong u ruh ki long ki Nongai dawai Kabiraij hapoh ka dong ka shnat, u ma Carehome Pakyntein jait ba un long hi u Nongai dawai Kabiraij, u ju peitbniah bha ia ka rukom ai dawai jong ki Ma ki Woh jong u bad u kwah ba ma u ruh shisien ka sngi un long u Nongai dawai Kabiraij ban iarap ia ki parabriew ba kin ioh ia ka jingkoit jingkhiah na ki jingpang bapher bapher, hynrei pat ka long ka jingeh ia u ba kumno un lah ban long u Kabiraij.
Katba u dang pyrkhat kumno un long u Nongai Dawai ban iarap iala ki parabriew ba kin ioh ia ka jingkoit jingkhiah na ki jingpang bapher bapher haba um tip ia ki Jaitphlang Dawai. Jia ryngkhat katba u dangpyrkhat u la ioh ia ka jingpang ka baphylla bad ki kmie ki kpa ki la pyrshang ban wad dawai na ki jaka sumar (Hospital) hynrei lehnohei ki dawai kim shym la iadei bad ka jingpang jong u. U ma Carehome haba iathuh ha U Yutip, u ong ba hapdeng kata ka jingpang u la phohsniew kawei ka jingphohsniew ka baphylla bad lyngba kata ka jingphohsniew la bthah ia u ban wad ia kum kita ki jaitphlang ki ban iarap ia ki briew ba kin ioh ia ka jingkoit jingkhiah bad la ong hadien kane ka jingphohsniew haba u kyndit na kaba iohthiah ka jingpang jingshitom na ka met jong u ruh ka la shu koit la ka koit hi.
Haba u la koit na kata ka jingpang u la pyrshang ban wad ia ki Phlangdawai kumba la bthah ia u ha ka jingphohsniew. U la leit wad ia kita ki jaitphlang kumba la bthah ia u ha ka jingphohsniew bad haba u la ioh ia kita ki jaitphlang u la sdang ban ai dawai, ha kaba nyngkong ia ki ba pang kiba nium kumne kumtai hapoh ka dong ka shnong bad haba u la iohi ba kita ki jaitphlang dawai kiba u ai ka iarap ia ki briew ban ioh ia ka jingkoit jingkhiah, nangta u pyrkhat ba un plie da ka Dukan ai dawai.
Ha kaba sdang jong ka snem 1989, u la plie la ka Dukan ai Dawai ha Kynruhsaphlang ha ka juh ka por u la sdang ruh ia ka Herbal Health Care Centre ha Dulong Lumsawe Jowai ha ka snem 2015, hynrei na ki daw kiba um lah kiar kane ka Herbal Health Care Centre jong u ka la shukut kumto. Ia kane ka jaka ai Dawai kaba u plie ha Kynruh Saphlang (Jowai) la pynkynriah noh mynta sha Madan Kñia Khad, stand Shangpung Iawmusiang Jowai, ha kaba u la ai kyrteng ka “Pakyntein Indiginious Herbal Medicine & Research”.
U Dr. Carehome Pakynteiñ u ong ba ha kane ka jaka ai jingsumar jong u, u sumar ia ki jait jingpang bapher bapher, kata kum na ka jingpang Taro, Shwar, Bampong,Tijo (Tohjaw), Niangsohpet, Jyrhoh, Pangksuid (Kjut-khloo) bad kiwei de ki jait jingpang, kynthup ruh ia ka jingpang Cancer.
U Dr. Pakynteiñ un ju ai dawai thala thaleiñ kat ia kiba pan, hynrei ha shwa ba un ai dawai iano re iano u da peit da khmih bniah lyngba ki dak ki shin kiba paw ha u Khaw, ha ki Sbai bad kiwei de ki rukum peit ban lap bad ban shem ia ka daw jong ka jingpang bad kiba kumno ki jaitphlang dawai kiba u dei ban ai kaba iadei bad kata ka jingpang. U ma Carehome Pakynteiñ u la ioh ia ka nam Doctor (Honorary Doctorate) ha ka snem 2010 na ka Indian Board of Alternative Medicines, Kolkatta, kumjuh na ka Martin Luther Christian University (MLCU), Shillong.
U Dr. Pakynteiñ da ka jingkhot jong ki briew, u la leit sumar briew ruh shabar ri kum sha Nepal, Bangladesh bad kiwei de ki ri kiba marjan bad jong ka Ri India.
Halor kane ka kam ai dawai bad sumar briew jong u Dr. Carehome Pakynteiñ u la ioh ruh ia ki Award (Khusnam) bad ka jingithuh ia ki kam sumar bad ai dawai jong u kum na ka Indian Board of Alternative Medicines Calcutta, Head Department of Library and Information Science NEHU, Traditional Healer’s meet in North East Region of India, National Institute of Pharmaceutical Education & Research Guwahati, Science & Technology Planning Department and Members Secretary BRBC, Meghalaya bad kiwei de ki certificate kiba u la wan iashim bynta ha ki jingialang jong ki Herbal health treatment.
Ha ki snem kiba kham mynshwa ka bai dawai ka tat, hynrei namar ba ka bai sngi jong ki Nongwad phlangdawai ka la rem kumta la ong ba u hap shim beit laispah tyngka shisong ka dawai ia kano kano ka jait jingpang.
Ha ki por ba kham mynshwa u ma Carehome u long ruh u wei na ki riew ialehkai uba la ioh ia ka kyrdan 4-Dan Black Belt, ula ju ai jinghikai ruh ia kiba bun ki samla jong ka nongbah Jowai bad shabar. U la ioh ruh ia ka kyrdan kum u National Judge ha ka Kick Boxing hapoh ka ri India nalor kiwei de ki jingiashim bynta jong u ha kane ka kam ialehkai.