U District Election Officer (DEO) jong ka West Garo Hills District ula ai katto katne ki jingpynbna ba donkam kiba iadei bad ka elekshon Lok Sabha.
Ki jingpynbna ki kynthup ia ka jingshah ia ki nongthep vote kiba la heh rta kiba don ha ka thup kaba 85 snem shaneng bad kito ki nongthep vote kiba don jingduna (Absentee Voters Person with Disabilities) bad ruh lada don kino kino ki nongthep vote jong ka 11-Assembly Segments ba hap hapoh ka 2-Tura (ST) Parliamentary Constituency kiba shem shitom ban leit thep vote hapoh ki Polling Station jong ki na ka daw jong ka jingshitom, ki lah ban ioh ia ka lad ban thep vote ha la ïing sah, lyngba ki Ballot da kaba pyndap ia ka Form-12 D bad pynpoi sha ka ophis jong u Returning Officer.
Ia kane ka Form-12 D lah ban ioh na ki BLO, lane na Postal Ballot Cell na phyllaw jong ka ophis u DEO. Ia kane ka Form-12 D ka ba la dep ban pyndap dei ban pynpoi ha ki BLO lane da kaba leit pynpoi ha Postal Ballot Cells ha lane shwa ka 23 tarik u bnai March 2024.
Na ka bynta ki nongtrei kiba don bynta ha ka kam elekshon ba kynthup naduh ki Returning Officers, ki Zonal Magistrates, ki Sector Officers Civil, ki Sector Officers Police, ki Pulit pahara, ki Drivers bad ki Handymen ki bym ioh lad ban thep ia ka vote jong ki ha ki Polling Sation la jong ki lah ban pyndap da ka Form-12 na ka bynta ka Postal Ballot bad kane ka long na ka bynta ki don vote ha ka 1-Shillong (ST) Parlimentary Constituency, lane ha ka Form 12A na ka bynta ka Election Duty Certificate na ka bynta kito kiba don vote ha ka 2-Tura (ST) Parliamentary Constituency. Ia kine ki Form lah ban ioh na Postal Ballot bad EDC Cell kaba don ha phyllaw jong ka ophis jong u Deputy Commissioner, West Garo Hills, Tura.
Kawei pat ka jingpynbna la bthah ia baroh ki Printing Press kiba shon ia kino kino ki jingthoh kiba iadei ba ka kam elekshon kum ki Posters, ki Banners bad kiwei, ki dei ban da shon ne pynpaw lang ia ka kyrteng jong ka Printing Press jong ki ha baroh kitei ki jingthoh ba ki la print. Dei ruh ban phah copy lai lai tylli shi jait kat kiba kila print sha ka ophis jong ka tnad Election, jong ka West Garo Hills.