Ka jingshah thok shah shukor jong ki paidbah kala nangjur katba nangmih ki sngi, la sakhi mynta ka sngi ki longkmie na ka shnong Sohmynting West Jaiñtia Hills District kila leit mih sha Jowai Police Station ban ujor ejahar pyrshah ïa uwei u briew uba la pan pisa ban pynïoh ïa ka tyndong lyer shet (Gas Cylinder) bad ka Stove shet jingshet.
Ïa utei u briew ba leh thok la tip kyrteng kum u Ialam Makri uba na ka shnong Umsning Nongthymmai, Ri-Bhoi District katkum ka jingpynpaw kitei ki longkmie, la ïathuh ba utei u briew ula kular pynïoh tyndong lyer shet (Gas) ïa ki 93 ngut ki longkmie ka shnong da kaba pan pisa haduh 2500/-, 4000/- lane 6000/- kawei ka longkmie.
Ha ka juh ka por utei u Ialam Makri ula pynithuh ïalade kum u nongtrei Agency ban pynïoh Gas ïa ki naka M/s Ri Pnar bad na M/s Rymbai. Da kaba ula pyndonkam ruh da ka seal kaba don ki jingthoh INDANE CYLINDER GAS STORE bad ka INDANE GAS CYLINDER ban ai shap ha ka Cash Memo ban lum pisa na ki nongshong shnong.
La ïathuh da kitei ki longkmie baroh ka pisa kaba la dep siew sha u ka la kot sha ka 3 lak tyngka tam, ïa kane ka kam ula leh naduh u bnai Jymmang, 2023 hynrei ula dep ban sam tyndong lyer shet (Gas) tang kumba 20 ngut ki longkmie hynrei haduh mynta utei u briew ula jah bad khlem da wan mih shuh shapoh ka shnong.
Ka jingïoh lad jong utei u briew ban leh thok bad leh shukor ïa ki longkmie ka shnong ka long da kaba ula leit mih shwa sha ki bor shnong ba kin shah ïa u ban leh ïa kane ka kam hapoh ka shnong, ka shnong da ka jingthmu ïa ka kam ba bha kala shah ïa u ban leh ïa katei ka kam, hynrei kala long pat ka kam thoh kam shukor jong u.
Halor kane kitei ki longkmie kila leit ban buh da ka ejahar ha Jowai Police Station ban dawa pynshitom shi syndon ïa utei u Ialam Makri da kaba kem bad leh ïa kaba donkam bad ba un pynphai noh de ïa ka pisa kaba u la dep shim, ha ka juh ka por kila kyntu ïa kiwei de ki longkmie jong kiwei de ki shnong ba kim dei ban shah pynbeit ha kum une u briew.
