Ha ka jingiadei bad ka jingbud dien ia ka case kaba la file ha Police Station Nongpoh kaba don ia ka case no.25 (3)24 u/s 12013/121A IPC r/w Sec 10/13/18 UA(P) Act and Sec 5/6 Explosives substance Act, ki Pulit jong ka Ri-Bhoi kila ioh ban kem noh sa ar ngut ki briew kiba donkti ban kit ia ki tiar pynbthei ha Ri-Bhoi.
Ha ka jingtohkit jong ki Pulit ia kitei ki ar ngut ki bym pat pynpaw kyrteng ki Pulit kila lap ia ka jingdonkti jong ka HNLC ban pynsngewthuh bakla ia ki samla bad ruh ban pynkhlaiñ ia ki kam dawa pisa jubor jong ka, la ong ka khubor Pulit ba la pyllait mynta ka sngi da u SP Ri-Bhoi District u Jagpal Singh Dhanao, IPS.
Na ka liang jong ki Pulit kila thew jur ia kino kino kiba don bynta ha kaba noh synniang sha ka HNLC bad la da lap ia kum kita yn sa pynshitom ia ki katkum ka kyndon aiñ Unlawful Activities Prevention Act. Ha kawei pat ka case ki Pulit kila register case pyrshah ia ka jingpynher ia ka lama jong ka HNLC ha National Highway ha Ri-Bhoi District kaba la leh naduh u bnai August 2023.
Ki Pulit kila ong ba ka HNLC mynta ka pyntrei ia ki kam thombor jong ka da kaba pyndonkam lyngba ki social media bad ki VOIP (Voice over Internet Protocol). La bthah ia ki paidbah ba lada ki ioh kano kano ka phone na kane ka kynhun HNLC ki dei ban ai jingtip mar mar sha ki Pulit bad kumjuh ruh ban block noh ia ka profile ne ka contact number jong ki.
Mynta ka sngi ki Pulit kila pyllait ruh ia ka jingiakren pone hapdeng u Military Commander ka HNLC u Sanbor Pala bad uwei u briew uba donkti ha ka case jong ka jingshahkem ki tiar pynbthei ha Ri-Bhoi District. Ki Pulit ki pyntip shuh shuh ba ki lah ban kem ia kino kino kiba ki suba donkti bad ka HNLC na ka bynta ka jingtohkit ia ki.
[Kane harum ka dei ka sur jingiakren phone jong u Sanbor Pala bad u samla uba la shah kem ha ki Pulit]