U Pastor Meshak Shylla uba long ruh u Pastor haba kren sha ki samla ha ka sngi long jingialang pynkup burom ka Kur Shylla Khasi Jaintia ha Sabah Muswang, u la ong ka pyrthei ka long kaba eh bha mynta ki sngi ha ka jingiadei bad ka jingnang jingstad da kaba ong ba wat haba la ioh haduh 80 % shaneng ki marks ruh wat tang ban ioh Admission ha ki jaka pule ne College ba ka long kaba eh, namar mynta ka pyrthei ka la bun kiba nang bastad kaba la long ka jingiakhun (Competition) ia ki samla pule mynta haba thmu ban leit pule sha kiwei pat ki kyrdan bakham shalor, ula ong ruh ba mynta ki sngi ki kmie ki kpa kim pynleit skul shuh ia ki khun jong ki na ka bynta ban ioh kam sorkar hadien ka jingpule, namar mynta ym shuh kum ka por kaba mynshwa, ym dei ban khmih lynti ban ioh ia ka kam sorkar hynrei lada don ka jingstad lah ban trei ia shi bun kiwei pat ki jait kam.
U la ong ruh ia ki samla ba kane ka jingpynkup burom ia ki ka long tang kum ka jingpynkynmaw ia ki, ba kin nang iaid trei shitom shuh shuh nangne shakmat, na ka bynta ban long ki khlur ki ban wan rah ia ka nam ka burom ia ka kur bad ka jait bynriew. U khot ruh ban don ka jingiatylli hapdeng ki para kur, ‘Ka jingiatylli ka long ka Bor’ ong u Pastor Shylla.
Na ka liang u Pastor Meshak u la ai ruh ka jingiaroh ia ki nongkit kam ka seng Kur, ba ki la lah ban pynlong ia kum kane ka jait prokram kaba donkam bha na ka bynta ki samla, u ma Meshak kum u Pastor u la ai ka jingsngeng jingkyntu ia baroh ki para kur kiba la wan sha kane ka jingialang jong ki Kur Shylla.
Mynta ka sngi ia ka jinglang la pyniaid da u ma Barnes Shylla, ha kaba la ioh ruh ki jingkren na u President Sein Kur Shylla ma Pyrkhat Shylla.
