Ai jinghikai shna jingbam ba ar sngi ka JHDS ia ki SHGs ha Mynkre

Kum shibynta ban kyntiew ia ka ioh ka kot jong ki Self-Help Group (SHGs), ka Jaintia Hills Development Society (JHDS) ryngkat bad ka jingiatreilang bad ka ophis jong ka District Social Welfare Officer East Jaintia Hills District ka la pynlong ia ka jingai jinghikai ba  ar sngi halor ka kam Shna jingbam. Ia kane ka Training prokram la plie mynta ka sngi ka 26^th November 2021 da ka District Social Welfare Officer East Jaintia Hills District ka Kong R. Passah. La pynlong ia kane ka prokram ha ka Shnong Mynkre ha ka jingiadonlang u Rangbah Shnong ka Shnong Mynkre u ma Sunny Bareh bad kiwei de ki riew rangbah.

Haba ai Jingkren ha kane ka sngi plie ia kane ka prokram u ma Sunny Bareh u la kyntu bad ai mynsiem ia ki dkhot jong ki SHGs ba kidei ban shim khia ia kane ka prokram bad ban pyndonkam hok ia ki jinghikai ba ki la ioh. Shuh shuh u la ai khublei ia ka JHDS bad ka Social Welfare Department kiba la shim khia ban pynlong kum kine ki prokram na ka bynta ka jingmyntoi kiba bun.

Haba kren sha ki lad pathai khubor, ka District Social Welfare Officer East Jaintia Hills ka Kong R. Passah ka la kyntu jur ia ki nong iashim bynta ba ki dei ban pynleit jingmut bha ia ka kam ba ki trei bad ba kim dei ban kyrkieh ha ka jingiohnong hynrei ki dei ban iaishah ia ka por ban lait na ka jingdkut shiteng ha ka kam ba ki sdang. Ka kong R. Passah ka la ai jingmut ruh ia ki Group ba ki dei ban pyndonkam ruh ia ki soh ki pai ba mih nala ka jong ka shnong namar ba ki long kiba bha bad kiba bun ia ki vitamin bad nutrient.

Ha kane ka sngi la ioh ruh ka jingbatai halor ka hok jong ki longkmie ne kynthei ba la ai da ka Kong H. Pale kaba dei ka nongsaid ain jong ka One Stop Center Khliehriat. Haba ai jingkren ka kong H. Pale ka la batai shai ia bun ki aiñ kiba iarap ban iada ia ki kynthei na ki jingshah leh bor (Domestic Violence and Crime against Women). Ka la kyntu jur ia ki longkmie ba kim dei ban sheptieng haba ki ia kynduh kum kine ki jingeh hynrei ki dei ban  wan shakhmat namar don ka ain ban iada ia ki.

La pyniaid ia kane ka prokram ha kane ka sngi da u Coordinator ka JHDS u bah Denis Kurkalang u ba la maitphang ruh ka ka jingthmu jong kane ka prokram. La ioh ruh ka kyntien ai khublei na u ma Remigius Pyngrope u ba long u Cluster Coordinator ka JHDS.