Ki Waheh Shnong ryngkat bad ki paidbah nongshong shnong jong ki 5 (San) tylli ki shnong ba don ki Polling Sataion kiba kynthup ia ka Lapangap, Sanaro, Pdeiñiadaw, Lum Lakhiat bad ka Tamu Polling Station ki la phah da ka shithi jingkyrpad sha u Chairman jong ka Dlimitation Committee, Jaintia Hills Autonomous District Council, Jowai, na ka bynta ban pyniasoh ia kine ki 5 shnong sha ka Namdong Khanduli MDC Constituency.
Na ka liang kine ki San shnong ki la ai lang ia ki daw kiba biang ba ki kwah ban iasoh bad ka Namdong Khaduli MDC Constituency bad ban pyllait ia ki na ka 12 Barato-Mukroh MDC Constituency.
Katto katne ki daw kiba la pynpaw ka long ha ka jingiadei bad u surok ban leit ne poi sha kine ki san shnong dei ban iaid lyngba ka Namdong Khanduli kaba jngai tang kumba 7 Km, hynrei sha 12 Barato-Mukroh MDC Constituency ka jngai kumba 30 Km. Kine ki 5 shnong ki hap ha ka Namdong C&RD Block, ka PHC kaba jngai tang kumba 10 Km, hynrei sha 12 Barato-Mukroh MDC Constituency kin hap sha ka Laskeiñ Block.
Ha ka jingiadei bad ka elekshon MLA kine ki san shnong ki hap ha ka Nartiang MLA Constituency, hynrei ka 12 Barato-Mukroh MDC Constituency ka hap sha ka Mookaiaw MLA Constituency. Kumta ki paid nongshong shnong ki la shem jingeh shibun ban hap ha ka 12 Barato-Mukroh MDC Constituency.
Kumta halor kitei ki daw ba la kdew ki Waheh Shnong bad ki paidbah jong kane ka thaiñ ki buh ka jingkyrpad ia ki dkhot jong ka Delimitation Committee ban iarap lem ia ki da kaba pynhap bad pyniasoh bad ka Namdong-Khanduli Constituency, pynkut ka khubor.