Ka ophis District Tuberculosis officer, West Jaintia Hills ha ka 28 tarik kala rakhe ia ka World Tuberculosis Day ha District Library Auditorium halor ka phang pdeng “Yes! We can end TB” ha kaba u Deputy Commissioner ka District u bah B.S. Sohliya, IAS ula long u kongsan.
U DC haba ai jingkren ula iaroh eh ia ki Doctor bad ka kynhun jong ki kiba la trei khlem thait ban ialeh ban pynduna ia ka jingdon jong ki nongpang TB bad kiba la trei na ka bynta ban pynduh jait shisyndon ia kane ka jingpang TB napoh ka District. U la khot lang ia ki paidbah bad kiba iadon bynta lang ban ai ka jingiatreilang na ka bynta ban poi sha ka thong.
Ha kane ka sngi u bah Soyliya ula pyllait ruh ia kawei ak Music Video kaba long kum ka jingpynsaphriang khubor shaphang ka jingiada bad ka jingsumar ia ka jingpang TB.
I Dr. Evalyneda B V Laloo, District Medical Health Officer Cum District Tuberculosis Officer & DACO bad I Dr. Dasngewhun Shadap, MOTC Jowai TU kila ai jingkren halor ka phang pdeng jong une u snem.
Ka la don ruh ka jingsam certificates bad ki mementos da u kongsan bad kiwei sha ki briew kiba don bynta ban iakhun ia ka jingpang TB. Kane ka khusnam ka kynthup ia ka TB Free Village Award, SNC certificate/ Mementos, Nikshay Mitra certificate, best treatment supporter, best lab Technicians, best performing ASHA bad ka Media Engagement.
Ka ophis kala pynlong ruh ia ki sport ha kine ki khyndiat sngi na ka bynta ki khynnah skul LP bad UP bad ia ki khusnam la sam ha kane ka jingialang.
Kham ha shwa jong ka jingialang kala don shwa ka jingiaid rally kaba la iashim bynta da ki khynnah skul kiba la rah lang bad ki placard kaba pyni ia ki khubor jingiada na ka jingpang TB ha ka imlang ka sahlang. Ia kane ka rally la sdang na Ladthalaboh bad iaid ter ter sha Newhill, Iawmusiang, DC Ophis, Stand War bad pynkut ha District Library Mynthong Jowai.
