Ka Jaintia Students’ Movement (JSM) Mynsngat Unit mynta ka sngi ha ka jingleit jurip ia ka jaka theh ñiut jong ka Jowai Municipal Board (JMB) kaba don ha shnong Thadmusem kala lap ba kane ka jingtheh ñiut ha kane ka jaka kam iahap satia bad ki jingkular jong ka sorkar.
Ka seng ka lap ba ka JMB kala shu khlong ia ka khyndew bad theh ia ki ñiut hapoh kitei ki thliew, khlem don ka jingker kynroh baroh sawdong katei ka jaka. Nalorkata ka seng kala lap ba ka ophis ka la shu thang ia kitei ki ñiut kaba la wanrah ka jingsma iwtung ia ki bynta ba marjan.
Na ka liang ka JSM Mynsngat Unit kala kynnoh ruh ba ha ka jingwad jingtip na ki nongpyniaid shnong jong ka Thadmusem ba kynthup ia u Chairman bad Secretary Shnong ki pynpaw ba ka shnong kam shym la pdiang ia kane ka jingwan theh ñiut ka JMB, hynrei ka dei tang ka jinglehbor jong ka trai jaka.
Kumta ka seng ka dawa ba ka ophis JBM ka dei ban pynbiang ia baroh ki jingdonkam jong katei ka jaka bret ñiut bad katba kam pat lah ban pynbiang ka hap ban sangeh shwa ka jingwan theh ñiut.
