Mynta ka sngi ka Department of Political Science jong ka Shillong College ha ka jingiatreilang bad ka Systematic Voters Education and Electoral Participation (SVEEP) kumjuh bad the Office u Deputy Commissioner (Election), East Khasi Hills District ka la pynlong ia ka Open Mic Voters Awareness Program hapoh katei ka College.
U bah Eddy Ripnar, uba dei u dkhot jong ka Meghalaya Model United Nation ula ai ka jingbatai shaphang ki apps kiba ka tnat Election Commission of India (ECI) ka dang shu dep pyllait paidbah dang shen. Kawei na kita ka dei ka Know Your Candidate (KYC) app.
Kane ka app kan iarap shibun ban ioh lum jingtip shaphang u ne ka kyrtong ha ki constituency la jong, ha kaba lah ban tip ia ka jinglong jingman jong ki kyrtong la ki dei kiba don dak saw ne em, kan iarap ruh ia ki nongjied ne ki nongthep vote ban jied ia la ki jong ki kyrtong kiba khuid ba suba.
Sa kawei pat ka app ka long ka cVIGIL app, kane ka app pat ka iarap ia ki paidbah ban ai kano kano ka jingujor shaphang kino kino ki jingleh buittuh, kum ka jingsam pisa bad kiwei de ki jingai sngewbha ha ka por ba dang iaid ka jingpynkhreh elekshon bad ka jingthep vote.
Lyngba kane ka cVIGIL ki paidbah ki lah ban pyntip beit beit sha u Chief Electoral Officer bad na ka liang jong ka ophis jong u kin sa leh ia kaba donkam, hynrei ia ka kyrteng jong u ne ka nongai jingujor yn sa buhrieh la iathuh u bah Eddy.
Ha kane ka prokram la buh shibun ki jingkylli kiba iadei bad ka kam elekshon bad la sam ruh ia ki prais sha kito ki samla pule kiba lah ban ai ia ka jubab kaba dei.
