Ki bor pyniaid ba dei peit ia ka jingmaramot ia ka jingkieng Damsite ne ka Umiam Dam and Bridge kila pyntip mynta ka sngi ba ka jingtrei kaba la dep mynta kala poi sha ka 60% bad la khmih lynti ba ka kam kan dep noh hapoh ka 30 tarik u bnai June mynta ka snem.
La iathuh ba ia kane ka Dam kaba donlang bad ka jingkieng la sdang ban shna naduh u snem 1958 bad la pyndep ia ka ha u snem 1965. Hapdeng kine ki phew phew snem da ka jingbun jong ki kali bad ka jingkit palat pud jong ki kali kiba dei iaid lyngba kane ka jingkieng kala wanrah ka jingsynjor noh, ha kaba la hap ban maramot noh ia ka.
Kumta ka sorkar kala shim ia ka sien jam ban maramot noh ia kane ka jingkieng. Ia ka jingmaramot la pyntrei hapoh ka prokram Dam Rehabilitation Improvement Project (DRIP).
Na ka liang ki bor pyniaid kila pyntip ba hapoh ka 30 tarik u June yn shah tang ia kito ki kali ba khiah haduh 4 MT ban iaid lyngba ia ka jingkieng. Katba hadien jong ka 30 tarik u June pat yn shah ia ki kali kiba khia haduh 12 MT ym dei ban palat ia kata ban iaid lyngba ia ka jingkieng, khnang ba yn lah ban pynjlan ia ka bor jingkyrshan jong ka jingkieng Dam.