Ban ioh jingtip halor ka jingpynlum pynlang ia ki ñiut bad jakhlia ba mih na ka sor Jowai mynta ka sngi ka seng HITO West Jaiñtia Hill District ha ryngkat bad ka HITO Jowai Town hapoh ka jinglam khmat jong u samla Crissence Csoo uba dei u Secretary jong ka West Jaiñtia Hills District kila leit ban ia kynduh ia u Chairman jong ka Jowai Municipal Board (JMB) u ma P. Lyngdoh ha ka jaka treikam jong u.
Ha ka jingiakren bad ka seng na ka liang jong u Chairman ula iathuh ba ka JMB ka dang don hapdeng ka jingiaid lynti bad kala don ruh ia ka jaka ban bret ia ki jakhlia, tangba ka Board ka dang ap mynta ban ioh ia ki clearance na ki saw tylli ki Department kita ki long ka NGT, ka Pollution Board, ka Forest Department bad na ka Irrigation.
Ha ka jingiakren bad ka seng u ma Lyngdoh ula ong ba kumba long mynta ia ka rukom bret ñiut la shu ai Contract bad ka dang long tang shipor ar por bad kam pat dei kaba long permanent. Kumta ka seng ka pynpaw ia ka jingsngewkhia kaba jur bad kala ong ruh ba kum ka seng kam lah ban pdiang lada ka Municipal kan bret pathar ia ki jakhlia kat sha ba lap lane kumba long ha ki por ba la dep ha Mynkjai.
Kumta ka buh ka jingkyntu kaba jur ia ka sorkar ba ka dei ban shimkhia ban pynbiang noh kloi ia ka jaka bret ñiut kaba paka na ka bynta ka sor Jowai, namar ka seng kam kwah shuh ban iohi ia ki lum jakhlia kiba lang lymbum ha khmat DC ophis, Thomas Jones Synod College bad ha kiwei de ki bynta jong ka Iawmusiang. La kyntu ruh ba ka sorkar ka dei ban shna ia ki jaka bret ñiut katkum ka jingstad jong ka juk mynta.