Ka khubor ba la pyllait da u SP jong ka Ri Bhoi District u Jagpal Singh Dhanoa, IPS, la iathuh u ba uwei u koidi ba dang don hapdeng ka jingtohkit ba la tip kyrteng u Rudra Rabha uba dei ruh u nongialam jong kawei ka kynhun runar uba la shah kem ha ki Pulit Ri Bhoi ha ka 24.04.2024 ula sdien phasi noh ialade mynta ka step ha ka por kumba 4:00 AM (26.04.2024) hapoh Khanapara Police Station kaba la set ia u.
Katkum ka jingiathuh jong u SP la ong ba ia u Rudra Rabha la ioh kem ha ka 24.04.2024 bad la pynngat case ia u katkum ka Khanapara PS Case No.12(03)2024 U/S 379/401/511/307/34 IPC R/W sec 27(2) of Arms Act. Ia u Rudra la ialam shapoh ïingbishar ha ka 25.04.2024 bad ka ïingbishar kala rai ban buh ia u ha ka Police Custody na ka bynta 5 sngi. Ha ka jingtohkit ki Pulit ula phla ba ula buhrieh ia ka suloi shna hi hapoh kawei ka khlaw jong ka thaiñ Ranibari. Ha ka jingialam jong u ki Pulit kila ioh ban shimti ia katei ka suloi shna hi.
Ia u ne u koidi la pynkit biang sha Khanapara PS ha ka por 1:05 jong ka 26 tarik ba la set ia u namar bym don jaka set ha Rani Jirang BOP.
Hynrei mynta ka sngi ha ka por 4:00 AM u Pulit ba ap Duty ula lap ba une u Rudra Rabha ula sdien phasi ialade da kaba teh da ka lyngkhot jaiñ blanket kaba la ai ia u ban kup thiah.
Ha kaba iadei bad kane na ka liang jong ka kynhun Executive Magistrate napoh ka ophis Deputy Commissioner, Ri Bhoi District, Nongpoh kila wan ban pynlong ia ka jingtohkit ha ka jingiadonlang u Medical Officer ryngkat ka jingringdur ringdar. Kumjuh ruh la register ia ka case katkum ka Nongpoh PS Case No.42(4)2024U/s 304(A) IPC bad ka jingtohkit ka dang iaid shakhmat la pynkut u SP.