Ka ‘Bamphalar’ ka long kawei na ki rukom bad dustur kaba la ju leh hapoh ka shnong Jowai da ki katto katne tylli ki Dong hashwa ba ki nongshong shnong kin sdang ïa ka rep ka riang sha ki hali ki pynthor jong ki.
Na ka liang ka Dorbar Chnong Loomkyrwiang, Jowai hynnin ka sngi 26 tarik hapoh ka jingpeit jong ka Bamphalar Committee kala long kawei na ki dong ban pyndep nyngkong eh ïa ka Bamphalar jong une u snem 2024 da kaba pynlong ïa ka lehkai Drama ha Yungwalieh ka shnong, katba ha ka sngi ba bud 27 tarik la don ka jingïabam doh sngewbha da ki khun ka dong ka chnat, u Loom u pdeiñ kaba long ka rukom jong ki longshwa.
Ha ka jingïalang jong ka miet lehkai Drama la pynïaid da u Daioolang Pakma, Symbood Waheh Chnong, la ïoh ka jingnguhblei da u S.D. Laloo, General Secretary LDC bad la ïoh ka jingkren shaphang ka Bamphalar da u ma Lammat-OO Laloo, Waheh Chnong. Katba u Arkiru Laloo, Secretary Bamphalar Committee ula ai ki kyntien sngewnguh.
U ma Lammat-OO Laloo ha ka jingkren shaphang ka Bamphalar ula pynkymmaw ïa ki kyrteng jong ki waheh wasian, ki longkmie longkpa jong ka dong Loomkyrwiang kiba don ïa ka sap ka phong ban thoh ïa ki jingïathuh khana lehkai drama bad ki sur jingrwai kiba sngewtynnad bad shongdor bha.
Ula ïathuh ba ka Loomkyrwiang ka long kawei na ki dong kaba la bna nam ha ki por mynshwa khamtam haka liang ka rukom lehkai Drama da ki waheh wasian jong ka dong, kaba la pur sha kiwei de ki shnong kum sha Nongkrem, Moolamanoh bad sha kiwei de.
Shuh shuh ula ïathuh ha ki por mynshwa ha ka lehkai Drama ïaka bynta jong ka kynthei la pynriam pynbeit manka por da ki shynrang, hynrei kaba sngewkmen dei ka dong Loomkyrwiang kaba nyngkong duh ban pynmih Actress da ka kynthei hi bad kumta kiwei ruh ki dong kila sdang ban pynshlur da ki kynthei ban ïashim bynta ha ka lehkai drama jong ka Bamphalar.
Ha ka juh ka por u ma Lammat-OO Laloo, ula kyntu ïa ki khun samla ba kin don ka jingsngewtynnad ban ïashim bynta ha ka Bamphalar bad ban long kiba pynjanai shuh shuh ïa kane ka rukom ka dustur ban pyni hakhmat ka pyrthei ïa ka jinglong kyrpang ka jaitbynriew.
Katba ïa ka jingïathuh khana shaphang ka lehkai drama kaba la ai kyrteng ka Dustur la thoh bad pynwan dur da u Phrangsngi Shullai, kane ka (parom) jingïathuh khana kala ai shisha ïaka jingsneng jingkhraw ïa baroh kiba wan sakhi ïa kane ka Drama.
