Ki Pulit jong ka East Jaiñtia Hills District kila ioh ban kurup ia u drugs Heroin katba ki dang ki dang pynlong ia ka jingkhynra kali ha Ratacherra Check Post ha ka por 8:00 baje mynta ka step.
Ka khubor Pulit ka la iathuh ba ki Pulit jong ka East Jaiñtia kumba ju long manla ka por ki la pynlong ia ka jingkhynra kali mynta ka sngi ruh. Ha kane ka jingkhynra kila ioh ban bat ia kawei ka kali Mahindra Pick-up truck ka bym pat don satia ia u Registration Number (A/F). Ha ka jingkynra ia kane ka Pick-up ki Pulit kila lap ba kane ka kali ka kit ia kawei ka top plastic (drum) kaba 50 Liter. Haba kyndang ia katei ka top ki Pulit kila lap ia ki mar be-aiñ.
Ha ka jingtohkit ia u nongniah ula iathuh ba ia kine ki mar ba la wan rah na ka shnong Churachandpur na ka jylla Manipur la thmu ban pynpoi sha nongbah Shillong.
Une u nongniah u dei uba la tip kyrteng kum u Nehrinmang Haokip ba 36 snem ka rta na ka shnong M Songgel, Churachandpur District, Manipur.
Ki Pulit ryngkat bad ki nongsakhi kila lap ba napoh jong kane ka Top la ioh ban sei haduh 84 tylli ki synduk sabon kiba la pyndaw da ki kynja powder ba long lam byrtem lane rong umsoh ia kiba la suba ba ki dei ki drugs Heroin.
Haba la pynlong ia ka jingtest ia kitei ki powder la paw ba ki dei ki drugs Heroin. Kine ki drugs ki don ka jingkhiah 900 grams bad katkum ka dor ïew jong ki kala kot sha ka Rs.7.2 klur tyngka.
Ia kine ki drugs, ka kali Bolero Pick-up bad kawei ka mobile phone la kurup noh da ki Pulit ka East Jaiñtia.
Ia u nongniah jong katei ka kali la kem noh bad la pynhap ia u ha ka kyndon aiñ NdPS.