Ka Ñiaw Wasa United FC mynta ka sngi ka la pynliem da 2-1 kol ia ka Caroline SC ha ka lympung ialehkai phutbol ‘Semi Final’ ba nyngkong jong ka “Open to all 18 Above Football League Knockout Tournament-2021 ba la pyniaid da ka West Jaiñtia District Sports Association (WJDSA) ha madan Kiang Nangbah Stadium Dongmihsngi Jowai.
Haba phai sha ka jingiakhun ka la long kaba itynnad bad iakhait bha hapdeng kine ki ar kynhun namar ha ka jingiakhun jong ka kylla step ka Ñiaw Wasa United FC kala ioh ban thep kol nyngkong ha ka minit kaba 28 kaba la neh da shi kol.
Katba ha ka jingiakhun jong ka kylla miet kala nang kham itynnad shuh shuh hapdeng kitei ki ar kynhun ha kaba ka Ñiaw Wasa United FC ka ioh biang ban pynkhih jar ba ar lyngba u Dashngaiñ Sukhlaiñ ha ka minit ba 62, ka Caroline SC ka la pyrshah ban pynphai kylla ia kitei ki ar kol hynrei ha ka minit ba 80 u Romeo Shylla ula ioh ban theh ia ka shikol.
Ka jingïakhun kala kut noh da 2-1 kol, da kane ka jingjop ka Ñiaw Wasa United FC kala buh jaka ialade ha ka Final jong kane ka lympung mynta u snem.
Ka jingiakhun Semi Final kaba ar ka long hapdeng ka Lutituber Ialong pyrshah ia ka Mukhla Raij lashai ka sngi 30.11.2021 ha ka por 1 baje nohphai sngi, kiba jop napdeng kine kin aireng bad ka Ñiaw Wasa United FC ha ka Final.